ANG multi-awarded writer nga si Lamberto Getutua Ceballos natawo niadtong Abril 16, 1942 sa Cawayan, Dalaguete, Cebu ug maoy kinamaguwangan sa 11 ka managsuon.
Usa siya ka Bathalad-Cebu Hall of Famer. Ang iyang kalampusan naglakip sa Palanca Awards diin kaduha niya nasakmit ang Unang Ganti sa short story contest (Cebuano): “Ang “Tuba” sa 2015 ug “Ungo sa San Pilar” sa 2006. Nidaug usab ang iyang “Tinggutom sa Nayawak” sa ikaduhang ganti niadtong 2003.
Matod ni “Sir Lam” nagsugod ang iyang gugma sa literatura sa nag-eskuwela pa siya sa Cawayan Elementary School sa Dalaguete ug dayon sa Zapatera Elementary School sa dihang pasuwaton pa sila og formal ug informal theme sa ilang maestra.
Nabaid ang iyang talento sa high school sa Abellana National Vocational School diin siya nahimong features editor sa ilang school organ nga “The Light of Lapu-Lapu.” Una siyang nikulit og pangan dihang nidaug sa unang ganti ang iyang “Grandpa’s Fighting Cock” sa ilang weekly Students’ literary section sa Kislap-Graphic Magazine niadtong 1958.
Si Ceballos nigradwar sa Abellana nga 4th Honorable Mention ug nakadawat og Certificate of Proficiency in Journalism pag-1959. Usa usab siya ka scholar sa Doña Modesta Singson Gaisano sa nag-eskuwela pa siya sa University of San Carlos ug na-staff writer sa The Carolinian. Nigradwar sa kursong Bachelor of Science in Commerce major in Accounting ug nipasar sa CPA board niadtong 1967.
Ang 78-anyos nga si Ceballos ang naila karong Cebuano language consultant ug literary editor sa Superbalita Cebu sud na sa 15 katuig. Nia ang tipik sa akong pakighinabi niya nunot sa ika-26 nga Anibersaryo sa Superbalita Cebu ugmang adlawa, Oktubre 23.
Lamberto Getutua Ceballos, Ssssuper Ka!
Giunsa nimo pagsugod sa Superbalita?
Gi-rekomendar ko ni anhing Ernesto Lariosa kang Atty. Cheking Seares nga mopuli niya niadtong September, 2005 dihang napili siya nga mosulat sa history sa San Fernando, Cebu.
Unsay tan-aw nimo sa atong Binisaya?
Ang Binisaya karon sa Superbalita milambo na pag-ayo. Gani, dugay na gipahunong sa editor-in-chief ang “pre-audit” sa mga balita. Post-audit na ang akong gigamit. Hanas na sa pinulongan ang mga editor ug mga reporter.
Kumusta ka karong pandemya?
Work from home. Okay ra akong health. May gitomar ko nga maintenance medicine. Kami na lang duha sa akong misis (Estrella Abella pagka-dalaga, 76) sa balay namo sa Basak San Nicolas. Kami ra magkuri-kuri. Maglutog kan-on. Mopalit og sud-ang luto daan. Tan-aw og balita sa TV.
Inyo diay mga anak?
Puros na minyo ang tulo ug may kaugalingon nang mga panimalay. Si Maria Theresa, 48, CPA, MBA, DBA; Mark Lester, 45, BSE; ug Luke Walter, 43, BS-Accountancy.
Unsang orasa ka tigsuwat?
Sayo sa buntag. Kay sagad matulog ko sa gabii, alas 10. Momata ko alas kuwatro sa kaadlawon. Kon di ko mosuwat og balak o sugilanon, magbasa kog libro, o di ba magpili og mga tampo nga akong editan ug i-encode sa laptop para sa Superbalita.
Unsay sikreto sa taas nga kinabuhi?
Wa koy sikreto. Pero naglikay ko sa karne. Utan ug isda sagad namong sud-an. Kalma lang kada-adlaw. 1993 pa ko nibiya og panigarilyo. Moinom kog beer occasional na lang.
Unsay imong kalingawan?
Mag-videoke. Ganahan ko mag-videoke bisan yabag. Paborito nakong kantahon “Kahibulongan,” “Mona Lisa,” “Just Say I Love Her” ug “Secret Love.”
Unsay dili nimo makalimtan sa Superbalita?
Di ko makalimot sa kamahigalaon sa mga editor ug mga reporter. Gusto ko nga mahinumdom sila nako nga usa ka yanong tawo lamang ug kuntento sa kinabuhi nga gihatag kanako sa Labaw nga Makagagahom.
AWARDS
* Won first prize Kuwentong Pambata sa Ugoy ng Inang Wika (Cebuano Div.) DLSU-Manila. ‘Ang Bag-ong Tabanog ni Biboy’ - 2017
* Won first prize Palanca short story contest (Cebuano) ‘Tuba’ - 2015
* Won first prize Palanca short story contest (Cebuano) ‘Ang Ungo sa Sanpilar’- 2006
* Won second prize Palanca short story contest (Ceb.) ‘Tinggutom sa Nayawak’- 2003
* Won first prize Bathalad-Cebu story for children ‘Panamilit ni Dakulkol’ - 2011
* Won second prize balitaw contest, ‘Reproductive Health’- 2011
* CCP grantee for Cebuano poetry ‘Ang Libud-suroy nga Mga Bata sa Colon’- 1993
* Won third prize Gawad Komisyon sa Wikang Filipino short story (Cebuano division) ‘Ang Tinuod nga Kinabuhi ni Amadix’- 2008
* Won first honorable mention GKWF poetry (Ceb.)‘NahimoKong Magbabalak’- 2008
* Won first prize Bathalad-Cebu short story ‘Ang Kapilya nga Gisunog’- 2009
* Won first prize Bathalad-Cebu story for children ‘Ang Bata nga Nakaadto sa Bangaw’- 2009
* Won second prize Lunsayng Bisaya short story ‘May Higayon ang Pagbawos’ - 2008
* Elevated to Hall of Fame by Bathalad-Cebu - 2009
* Bathalad-Cebu ‘Writer of the Year’- 2006
* Won first prize Women in Literary Arts of Cebu (WILA) story for children, ‘Si Inday Siloy ug ang Iyang Awit’- 2002
OTHER WORKS
* Hunger in Nayawak and other stories -- book, anthology of 17 original Cebuano stories with English translation, published by the University of San Carlos, Cebuano Studies Center in 2012.
* Phantom of the Times -- poem, published in Philippine Free Press in 1967; included in Literature for Filipinos of Today, Philippine Prose and Poetry Series for High Schools, Vol. IV, in 1969.
* Saturday Night is Also Lonely -- poem, published in Homelife Magazine; included in anthology, “In Time Passing, There Are Things’ in 1999, edited by Dr. Leoncio Deriada.
* Four novels serialized in Bisaya Magasin: (a) Ayaw Na Ako Ihatag sa Lain; (b) Luha sa Kagabhion; (c) Ang Unang Asawa ni Domino; (d) Ang Palad ni Conchita
* Three pocketbooks (romance novels): (a) Gugmang Way Paglubad (published by Carangue Press; (b) Balik sa Sabakan sa Gugma (published by SunStar Publishing); (c) Pilion Ko ang Gugma Mo (published by SunStar Publishing).