DEAR Noy Kulas,
Maayong adlaw ninyo diha sa Super B. Tawga lang ko og Peryong, 42 years old ug avid fan na nimo sukad kaniadto.
Ang akong problema ang akong usa sa duha ka uyab. Nag-edad pa ni siya og 22 years old ug last year lang ni-graduate sa college. Nag work na siya dayon. Mga tulo ka tuig na mi ani niya ug natural, sa kadugayon, amo nang gidimdim ang katam-is sa pagminahalay. Maayo lang kay wa pa siya momabdos.
Pero duna koy girlfriend sud na sa five years ug toa sa abroad nag work. After one year namo nga nagkauyab, nilarga siya sa abroad. So, wa nako siya makuha kay sagad kutob ra mi sa romance kay gusto niya virgin siyang dad-on sa altar sa kaminyuon. Karon, gusto siyang mouli next year aron magminyo mi kay 32 years old na siya.
Akong gisultihan ang batan-on nakong uyab ug di siya makadawat. Ni threaten siya nga maghikog but iyang pahibaw-on ang akong GF sa among relasyon. Galibog na ko aning problema kay gawas nga nahadlok kong iyang tinud-on, love sab nako siya. I admit, nabahin ang akong heart nilang duha. Noy, unsa man ang akong buhaton? Please tambagi ko.
PERYONG
Peryong,
Tug-ani ang imong uyab nga toa sa abroad sa imong sitwasyon karon kay sa madugay o madali, iya ra ning mahibaw-an in the coming days tungod sa technology karon aron makapangandam ka na sa unsay mahitabo ug di siya makalitan nga gikan sa laing tawo ang impormasyon. Pagpangayog pasaylo sa imong uyab sa imong nabuhat kaniya. Kon unsa man ang iyang kasuko nimo dawata. Kon unsa man ang iyang desisyon dawata kay imo man kining gituyoan. Way nagsugo nimo nga manguyab og lain, di ba?
Di man mahimong makabaton ka og duha ka mga babaye at the same time. Either nila imong pilion ug minyoan. Kon buwagan ka sa imong unang uyab, which is more likely, hold on na lang nianang babaye nga imong nabirhenan. Kay kana ra bang bayhana nihatag sa tibuok niyang pagkatawo diha nimo tungod sa iyang dakong gugma ug pagsalig.
NOY KULAS