SUPERBALITA CEBU

Barangay officials giharos og posas

LABING unang higayon sa nasod nga mga opisyal sa usa ka barangay ug mga staff gipangharos og dakop ug gipusasan sa kapulisan tungod sa giingong anomaliya sa Social Amelioration Program (SAP) fund.

Sa Miyerkules sa buntag, Oktubre 21, 2020, gidakop ug gipusasan sa kapulisan sa lungsod sa Barili ang tanang mga opisyal sa Barangay Tubod, Barili. Giapil pagdakop ang laing unom ka mga staff sa barangay pinasikad sa warrant of arrest nga giluwatan sa korte sa kasong graft nga gipasaka niadtong Mayo ning tuiga.

Matod ni Police Captain Romeo Caacoy, hepe sa Barili Police Station, nga ang 14 ka mga tawo, walo niini opisyales sa barangay nga naglakip sa kapitan ug unom ka mga staff sa barangay, ningtahan kuyog nila ni Mayor Julieto Flores ug Fr. Fiel Suico, kura paruko sa simbahan sa Barangay Mantalongon.

Giila ni Caacoy nga ang mga dinakpan nga sila si Tubod Barangay Captain Aurelio Mabano ug mga konsehal nga sila si Mercy Camonas, Romulo Omalay, Baleriano Mabano, Roy Tangarorang, Loreto Ejambre, Arthur Aranda ug Carlo Emnace.

Samtang lakip nga nadakpan ang mga sakop sa barangay health workers nga sila si Victoria Talara, Maricar Escabillas, Mary Jane Elizar, Modesta Mambinuyao, Ludy Tanudra ug Ruchina Panugaling, parent leader sa 4Ps.

Sa pag-abot sa police station, gi-serve nila ni Caacoy ang warrant of arrest nga giluwatan ni Judge Anabelle Robles sa Branch 60 sa Barili sa kasong paglapas sa Section 3 (b) sa Republic Act 3019 kun Anti-Graft and Corrupt Practices Act.

Ang korte nitugot og pyansang P90,000 matag usa alang sa ilang temporaryong kagawasan. Sa Miyerkules sa hapon, silang tanan nakapiyansa hinungdan nga wa na mabilanggo.

“Kadto ning mga napasakaan sa ilang kalambigitan sa Social Amelioration Program nga gi-file niadtong buwan sa Mayo. Ug mao ni human nga nilusot ang kaso ato dayon gi-serve (ang warrant of arrest) kanila,” matod ni Caacoy.

NGANONG GIKIHA

Way klaro nga pagtubag sa mga konstituwente labot sa mga reklamo sa SAP ang hinungdan sa paglambo sa kaso.

Kini maoy gikompirmar ni Flores atol sa pakighinabi sa Superbalita Cebu kaniya.

“Tungod kay wala man gud nila gitubag og tarong ang mga summon mao na nga ni-prosper ang kaso. Unya ang kapitan sad, iyang mga anak naapil sad sa social amelioration. So, regardless ana if kon tinuod man gyud nga naglisod gyud ang anak, syempre maapil na. Pero wa man nila maayo pagkatubag mao na atubangon nila ang kaso,” matod ni Flores.

Matod ni Flores nga dili angay nga i-tolerate ang maong mga kalihukan ilabi na ubos sa iyang pagduma sa lungsod. Hinungdan nga kinahanglan nga manubag ang mga akusado sa korte.

Matod sa mayor nga bisan pa sa hitabo, wa siya mawad-i sa pagsalig sa mga opisyal sanglit nagtuo siya nga di tanan nga gipasanginlan, sad-an.

“Actually ako man gani silang gitabangan kay kauban sa grupo. In fact, ni voluntary man sila og surrender... Yes, dili man tanan. Naa may nabiktima ra kay naa man sad uban natingala nganong naapil sad to sila. Pero sila nay bahala motubag sa mga akusasyon sa korte. So, para nako diha nalang ko kutob. Di nako mohatag pa og lain nga isyu,” matod ni Flores.

Samtang ang tulo sa mga konsehal nga sila si Aranda, Ejambre ug Emnacen nihimakak sa mga pasangil batok kanila.

Matod sa mga konsehal nga ang usa sa tinubdan sa anomaliya mao ang walay saktong koordinasyon sa kapitan kanila ingon man ang makaduda nga pagkalakip sa iyang mga anak nga nakadawat sa SAP.

“Mao na nga nangreklamo na ang mga taga barangay tungod sa lapses sa paglihok sa among kapitan kay wa gyud siya magpatabang sa council. Dapat nanawag unta siya niadtong higayona di kay pirma nga pirma lang unya ang resulta mao nani among giatubang karon,” matod ni Ejambre.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph