GIPAILAWOM na sa RT-PCR test ug contact tracing ang mga barkada sa lalaki nga nagpositibo sa coronavirus disease (Covid-19) kinsa nakig-inom og ilimnong makahubog didto sa Barangay Sasa, Davao City.
Mismong si Barangay Sasa Kapitan Jerry Licarte ang nagkompirma sa hitabo pinaagi sa pakighinabi sa dxGM Super Radyo kagahapon sa buntag, Oktubre 22.
Gibutyag ni Licarte nga nakig-inom ang nag-positibo nga lalaki sa iyang mga barkada ug sa dihang nasuta nga siya positibo, gilayong gipailawom sa swab testing ang mga nakainom niini.
Giingon sab ni Licarte nga nagpositibo sab sa Covid-19 ang asawa niini sa lalaki nga nagtrabaho isip usa ka government employee.
Sumala sa opisyal nga atol sa gilusad nga contact tracing, diin sa paggula sa resulta duna sab nagpositibo sa iyang mga barkada.
Sa talaan sa Department of Health (DOH)-Davao, Oktubre 21, lima ka mga bag-ong kaso ang natala sa nahisgutang barangay diin ning kasamtangan dunay duha ka mga panimalay sa maong barangay ang gi-cordon lakip na ang panimalay sa maong magtiayon ug silingan niini.
Gibutyag sab sa kapitan sa Super Radyo nga matag karon ug unya naningkamot sila nga ma-trace pa ang mga nakasalamuha sa nagpositibo sa maong barangay.
Kagahapon sa hapon, gisulayan og kuha sa Superbalita Davao ang bahin ni Licarte, apan nagdumili pa kini sa paghatag og dugang impormasyon sanglit nagpadayon ang ilang gihimong contact tracing sa maong insidente. (Jeepy P. Compio)