DAVAO DEL NORTE -- Hugtanong gipanawagan ang tanang nilamay sa St. Peter's Chapel sa Room 102B nga magpuyo sa ilang mga balay ug i-monitor ang panglawas kung wa ba'y mabatyagang sintomas sa Covid-19.
Kini ang gibutyag sa lokal nga panggamhanan sa siyudad sa Tagum nga na-post sa ilang Facebook page human nasubay sa Covid-19 City Task Force contact tracing team ang naadtoan sa bag-ong nagpositibo sa Covid-19 sa siyudad.
Matud pa nga ang bag-ong nagpositibo sa Covid-19 mao ang 65 anyos nga babaye nga taga Barangay Magugpo North, kinsa nasuta nga way laing naadtoan kon di ang nahisgutang haya ug lubong sa iyang paryente.
Nasayran nga ang lamay nagsugod Oktubre 13, 2020 ug ang lubong gipahitabo Oktubre 19, 2020 kung diin dunay gipahitabong Santos nga Misa sa Suaybaguio Church alas 8:00 sa buntag hangtud alas 9:00 sa buntag ug dayong gisunod ang lubong didto sa Palm Haven Memorial Park gikan sa alas 9:00 sa buntag hangtud sa alas 11:00 sa buntag.
Ang Covid-19 City Task Force hugot nga nagmando sa tanang nakaadto sa lamay ug lubong mga motawag sa Covid-19 Hotline - 09517953257 (Smart), 09511646965 (Smart), ug 09959903957 (Globe).