MOABOT 189 ka mga balay sa duha ka mga sityo sa lungsod sa Bantayan gipaubos sa granular lockdown sa Oktubre 22, pahibawo sa lungsod pinaagi sa official page niini.
Subay sa impormasyon, nikatap ang kagaw sa coronavirus disease (Covid-19) sa 138 ka mga balay sa Sitio Bayabas samtang 31 usab ka balay sa Sitio Kapayas, Barangay Hilotongan.
Kini tungod sa gidudahan nga pagka-expose atol sa gikatahong pagtapok sa usa ka lugar nga dunay kaso sa Covid-19.
Aron mapugngan ang pagkatap sa kagaw, nadesisyonan sa rural health unit nga i-lockdown ang lugar nga giuyonan usab ni Mayor Arthur Despi.
Subay sa uwahing datos sa lungsod sa Oktubre 22, niabot na sa 26 ka mga aktibong kaso ang natala, gikan sa siyam lang unta sa miaging semana.
Sagad sa mga natala nga kaso naggikan sa naasoy nga barangay, gisundan sa mga barangay nga nakatala usab og kaso sama sa barangay Ticad, Sillon, Sulangan ug Bantigue.
Bisan paman niini, nakatala hinuon og 42 ka mga recovery o naayo na sa sakit, apan usa na ang namatay. (ANV)