Dear Papa Joe,
Tawga lang ko sa ngan nga Lover Boy, 30 years old ug ulitawo.
Wa pa gyud ko kasuway og uyab-uyab sa una. Karon lang ko nakauyab kay naa koy deperensya sa akong pagkatawo. Mauwaw ko. Naa koy deformities sa akong lawas.
Karon nakahimamat ko og textmate. Wa gani sa FB kay wa kuno siyay FB kay province ilaha. Sweet kaayo siya ug nasayod siya sa akong kahimtang. Matod pa niya nga nadawat ko niya. Karon nga magbuwan na mi kapin sukad nagkauyab, nausab man siya. Nahimo siyang dominante. Masuko siya kon di matubag ang iya tawag bisan kaadlawong dako. Masuko siya nga mouban ko sa akong mama mangumpra.
Daghan na kaayo siya og reklamo mao nga nakigbuwag ko niya. Karon magsige gihapon siya og samok nako. Unsa may angay nakong buhaton?
LOVER BOY
Lover boy,
Kon di ka gustong samukon, pag-usab o pag-ilis og number. Pero kon di ka makausab kay importante nimo na nga numero, aw i-ignore lang siya kay mapul-an ra na kadugayan.
Lisod man ang ing ana. Wa man mo magkita. Basin gi-good time lang ka ana kay sakay sad kaayo ka niya. Wa gani ka masayud kon tinuod ba na siya nga babaye o unsa ba. Basin pampalipas sa laay lang ka. O desperada sad na siya.
Kani lagi nga naghandom sad ka nga basin jackpot na mao nahug ang imong pagbati. Pero basin sa personal lahi, magmahay ra ka. Sunod ayaw padala ana nga style. Again, ignore.
PAPA JOE