Barrita: Pagbangon sa turismo sa Sugbo
Gibuksan na pagbalik ni Cebu Gov. Gwendolyn Garcia ang turismo sa Sugbo. Ang turismo usa sa mga industriya nga labing apektado sa kurintinas aron pagpugong sa pagkuyanap sa Covid-19. Sirado ang mga border. Di makasuroy ang mga tawo. Patay ang turismo.
Apan tungod kay ubos na man ang tibuok lalawigan sa Sugbo sa modified general community quarantine (MGCQ), giablihan pagbalik ang mga utlanan sa kalungsuran ug mga syudad. Makagawas na sa balay ug makasuroy na sab ang kadaghanan sa mga tawo.
Gani ang Cebu Provincial Tourism Office (PTO) mipahibawo nga gitugotan na sa pagbukas pagbalik ang 52 ka mga hotel ug tourism establishments sa lalawigan nga temporaryong nasira sud sa unom ka buwan tungod sa lockdown batok sa coronavirus pandemic.
Daghan na og kailin-ilinan ang mga turista nga mosuroy sa Sugbo. Ang akong madali-dali mao ra gyud ang Green Lagoon sa lungsod sa Compostela. Lakip sa gibuksan mao ang turismo sa lungsod Sta. Fe sa isla sa Bantayan.
Ang mando sa gobernador – di lisud-lisuron ang mga turista nga mobisita sa lalawigan sa Sugbo. Duha ra ka rekisitos ang ipakita sa turista nga mobisita sa Sugbo. Mao kini ang confirmed booking sa online portal sa Kapitolyo o hotel confirmation ug ticket.
Matod sa Cebu Provincial Tourism Task Force (PTTF), ang confirmation sa online portal maoy mag-ila sa mga turista gikan sa mga locally stranded individual (LSI), authorized persons outside residence (APOR) ug overseas Filipino workers (OFW).
Liboan ka mga Sugbuanon nga nagtrabaho sa industriya sa turismo ang nawad-an sa ilang inadlaw nga panginabuhi sa dihang gisirad-an ang mga tourism establishments tungod sa kurintinas sa Covid-19.
Naminghoy ang mga tawo nga nagsalig sa whale shark watching sa lungsod sa Oslob. Nakadiskanso sab hinuon ang mga butanding gikan sa libo ka libong mga tawo nga gustong motan-aw kanila. Ambot lang kon wa ba kaha sila mingawa sa mga tawo.
Apan niining pagbukas sa turismo sa Sugbo, kinahanglan gihapon ang pag-amping sa katawhan. Naglakip kini sa pagpanghugas sa mga kamot, pagsul-ob og face mask, face shield ug social distancing. Nikunhod ang mga kaso sa Covid-19, apan wa pa kini mahanaw.