Nalzaro: Leksiyon sa SAP

Nalzaro: Leksiyon sa SAP

Ang nahitabo sa mga opisyal sa Barangay Tubod sa lungsod sa Barili maoy magsilbing leksiyon sa atong mga opisyal sa barangay o kagamhanan nga masobrahan usahay ang pamulitika o adunay paburan pinaagi sa pag-una sa ilang mga paryente kon adunay hinabang gikan sa kagamhanan. Ang mga opisyal sa Barangay Tubod, nga gipanguluhan sa ilang kapitan nga si Aurelio Mabano mi-surender ngadto kang Barili Mayor Julie Flores human sila malutsi og warrants of arrest sa kasong graft.

Ang maong mga opisyal, pito ka konsehal apil ang unom ka mga barangay health workers nalutsan og warrants of arrest human sila pasakai og kasong kalapasan sa anti-graft and corrupt practices act o Republic 3019 ngadto sa korte. Ang Criminal Investigation Detection Group (CIDG 7) ang nag-imbestigar sa mga kaso sa paglapas sa pagpanghatag sa Social Amelioration Program (SAP) niadtong mga naapektuhan sa Covid 19 pandemic.

In fairness sa maong mga opisyal, wala nila gibulsa ang pundo sa SAP. O gikapnan o gikilkilan ang mga benipisaryo. Na-apil lang sa listahan sa beneficiaries ang ilang mga kabanay nga dakong supak sa guidelines sa Department of Social Welfare and Development (DSWD). Kalapasan gihapon sa anti-graft law pinaagi sa paghatag og bentaha o due advantage sa ilang mga kabanay.

Apan ato ba silang mabasol kon nahatagan ang ilang mga kabanay? Una, didto sa probinsiya o bisan man gani sa pipila ka mga barangay dinhi sa siyudad, halos paryente man ang mga tawo. Diha gani sa Lapu-Lapu City adunay halos mga Berdin family ang mga nahatagan ug ang kapitan Berdin usab. Unya dili man gyud ang mga opisyal sa barangay ang nanglista kon dili ang mga taga city o municipal welfare office man.

Unya ingon ana ning pamulitika. Kon opisyal ka sa barangay unya gusto kang mamulitika sa mga hinabang, aw, natural imo unahon ang imong mga supporter ug kabanay. Morag kultura na nato nang mga Pinoy. Daghan ang naghimo niini niadtong hinatagay sa SAP. Aw, dimalas lang ang maong mga opisyal kay dunay lig-on ebedensiya batok nila. Leksiyon na ni sa uban.

(bobbygnalzaro@gmail.com)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph