LAND trip ang paagi sa pagpalusot og illegal drugs gikan sa kaulohan paingon dinhi sa Sugbo sakay sa usa ka pribadong awto.
Mobiyahe kini makaduha sa usa ka semana, diin matag trip magkarga og 30 ka kilo sa shabu. Nagpasabot nga dunay labing minos 240 ka kilo nga shabu ang mosulod matag buwan dinhi.
Nitumaw kini nga impormasyon gikan usa ka tinubdan nga nipahibawo sa National Capital Regional Police Office (NCRPO) hinungdan nga nakig-alayon sila sa Regional Intelligence Division (RID) 7 alang sa dugang pagpaniid.
Kini nisangko sa pagkasikop ni Gilbert Lumanog, kinsa nakuhaan og 22.1 kilo nga shabu sa usa ka buy-bust niadtong Oktubre 21, sa Sityo Lawis, Barangay Subabasbas, Dakbayan sa Lapu-Lapu.
Si Lumanog lumad nga taga Poblacion, Pinamungajan, apan nag-abang og balay sa sityo Plaza Housing sa Busay, Dakbayan sa Sugbo.
Matod ni Police Brigadier General Albert Ignatius Ferro nga dul-an sa usa ka buwan ang ilang pag-surveillance kang Lumanog human sila makadawat og kasayuran gikan sa NCRPO nga adunay moabot nga supply sa gituohang shabu sa Sugbos nga gikarga sa itom nga awto.
Nagtuo si Ferro nga gikan sa Golden Triangle ang shabu base sa klase sa putos.
Si Lumanog nalakip ten top regional level high value individual, diin ang iyang area mao ang tibuok a Sugbo.
Giingong giangkon ni Lumanog nga adunay manawag sa iyang telepono nga magpahibawo nga adunay ihatod nga butang ug ipa deliver sa laing tawo na usab.
Usa ka opisyal sa NCRPO nga dili magpaila ni butyag nga ang Regional Special Operations Group nakadawat og impormasyon nga adunay usa itom nga sedan nga magkargahan og 30 ka kilo sa gituohang shabu nga dalhon sa Cebu gikan sa Quezon City.
Human makuha ang impormasyon, nilusad dayon ang NCRPO og monitoring nga gitawag nilag Coplan Totong Toldo aron masayran kon unsa kini ka tuod.
Pagka Oktubre 12, 2020, ang NCRPO nagpadalag team gikan sa RSOG ug Quezon City Police District aron moanhi sa siyudad sa Sugbo alang sa case buildup.
Nakig-alayon dayon ang NCRPO personnel sa RID 7 alang sa hiniusang anti-drug operation.
Oktubre 14 atol sa subsub nga surveillance operation, ilang nasigpatan ang itom nga Toyota Vios (YKL 974).
Ila kining gisundan nga nag tadlastadlas sa kadalanan sa dakbayan sa Sugbo, diin ang mga sakay adunay itunol nga paper bag sa mga tawo nga wa nila mailhi.
Giplanohan na dayon ang buy-bust operation uban ang Lapu-lapu City Police Office, PRO-7 ug ang PDEA-7 nga miresulta sa pagka sikop ni Lumanog.
GIRELIBUHAN
Tanang personnel sa Philippine Drug Enforcement Agency (PDEA) sa dakbayan sa Dumaguete, Negros Oriental ang gipangrelibohan human masuta nga illegal ang pagdakop sa ilang lima ka target sa anti drug operation niadtong Hulyo 28, 2020. / AYB, BBT