PIPILA pa lang ka adlaw ang milabay human sa pagpusil patay sa police official sa iyang uyab una pa siya nagpusil sa kaugalingon sulod sa iyang sleeping quarters sa Police Community Precinct sa Barangay Bulacao, Dakbayan sa Talisay, mga barangay tanod duna nay nasinating kahibulongan.
Niadtong Miyerkules sa gabii, Oktubre 21, grabeng pagpanglimbawot sa balhibo sa mga barangay tanod nga maoy gitahasan sa pagbantay sa presinto sa Barangay Bulacao.
Kalit lang kini nilang nasinati samtang nagbantay sa dapit diin gipusil patay ni Police Lieutenant Praxilo Albiso ang iyang hinigugmang si Vernice Cardeno.
Si Leonides Ramos Jr., usa sa mga tanod sa Barangay Bulacao, nibutyag nga ang iyang mga kaubang barangay tanod nga maoy duty sa night shift nakasinati niini.
Matod ni Ramos nga natimahoan sa iyang mga kauban ang pagpanghumot sa buwak sulod sa buhatan nga unta wa may buwak sa palibot.
Nakadungog usab sila og tingog sa babaye nga nakigsulti, apan way tawo sulod sa lawak ni Albiso. Duna usab silay nadunggan nga sitsit.
Tungod niini, kagahapon sa buntag sa Huwebes, Oktubre 22, gipadala sa Police Regional Office (PRO-7) ang ilang chaplain aron pagbendisyon sa presento diin nahitabo ang maduguon nga krimen nga gihulagway sa kapulisan nga crime of passion.
Kini aron paghatag na og kalinaw ug mahiluna na ang kalag sa duruha.
Si Police Major Gerard Ace Pelare, hepe sa Talisay City Police Statio,niingon nga maayo ang trabaho ni Albiso isip deputy chief.
Apan nakaproblema lang sa iyang personal nga kinabuhi nga posibleng iyang giluom.