NIPILIT sa paril ang Ibabao-Estancia fire truck human maatrasan sa 30-footer nga truck van sa D.M. Cortes St., Barangay Umapad, Mandaue City, alas 10:17 sa buntag, adlawng Biyernes, Oktubre 23, 2020.
Matod ni Arnold Malig-on, ang operations head sa Traffic Enforcement Agency of Mandaue, nga ang 30-footer truck van nagbyahe sa D.M Cortes St. diin naa sa luyo niini ang fire truck.
Misuway og U-turn ang truck van sa direksyon paingon sa U.N. Avenue apan wala mabantayi niini nga nagsunod ang fire truck ug pag-atras niini aron makalubag na sa pikas direksyon, naatrasan niini ang fire truck diin napiit na kini sa paril.
Matod ni Malig-on nga walay naangol sa maong aksidente apan napahak ang isig kakilid sa fire truck.
Ang maong disgrasya miresulta sa pag-traffic sa lugar sulod sa 30 minutos tungod ang 30-footer truck van nag-ali sa tibuok dalan. (KFD)