UPAT ka mga kaso ang atubangon sa usa ka babaye nga nag-wild sud sa grocery store dihang gisita sa mga pulis gumikan wala kini nagsuot og face mask ug face shield.
Sukad sa pagsuwat ning balita Byernes sa hapon, Oktubre 23, napaslak pa sa selda sa Talomo Police Station ang nahisgutan samtang giasikaso ang mga papeles sa pagpasaka og kaso niini didto sa korte.
Sa spot report sa Davao City Police Office (DCPO) pinaagi sa Talomo Police Station, upat ka kaso ang atubangon sa maong babaye nga 48 anyos, negusyante ug residente sa Peace Avenue, Bangkal, Talomo, Davao City.
Kalapasan sa Republic Act (RA) 11332 kun "Mandatory Reporting of Notifiable Diseases and Health Events of Public Health Concern Act," Executive Order (EO) 55 Series of 2020 sa Davao City labot sa pagpatuman sa community quarantine sa siyudad, direct assault ug ang alarms and scandals.
Sumala ni DCPO spokesperson Police Captain Rosario Aguilar nga walay gipili ang kapulisan sa dakbayan sa pagpahamtang og silot.
Dugang ni Aguilar nga gilayong gidala sa mobile patrol sa Tourist Police ang nahisgutan sa presinto tres Huwebes sa gabii, human kini nag-wild sa grocery store sa Bangkal.
Una niini, nag-trending sa social media ang mga anggulo sa kuhang video diin gipugngan siya sa tourist police nga di makasud sa grocery store.
Apan milugnot ang nahisgutan kay gusto gyod niini nga mosulod, diin sa iyang pagtudlo-tudlo ug nahampakan niya ang pulis, gilayon kining gipasakay sa mobile patrol ug gidala sa Talomo Police Station.
"Gikustodiya nato karon ang nahisgutan, ug giproseso ang kaso, upat ka mga kaso nga iyang atubangon, hinuon puwede siya maka-bail niini," ingon ni Aguilar nga nahinabi sa Superbalita Davao Byernes sa buntag pinaagi sa telepono.
Nasayran nga notado na ang nahisgutan sa iyang batasan labi na kung mabikil kini diha sa publiko.
Daghan na sab og higayon nga iyang ipa-blotter ang pulis labi na kung mabadlong kini kung dunay pagsupak sa mga regulasyon diha sa publiko.
Ning kasamtangan, wa na kaarte ang nahisgutan dihang gi-mugshot ug gipaslak sa selda gumikan sa salaod nga iyang gihimo.