Mga duwa karon
4:00 pm- Terrafirma
batok NorthPort
6:45 pm- Alaska
batok San Miguel
Sumpayan og suway sa Alaska Aces ang ilang sunodsunod nga kadaugan sa ilang pagpakigbatok sa defending champion San Miguel Beermen sa main game karong gabii sa 2019-20 Philippine Basketball Association (PBA) Philippine Cup sa AUF Gym sa Angeles City, Pampanga.
Ang Aces nasubhan og duha ka sunodsunod nga kapildihan apan human niini, bangis kining ningbangon ug mirehistro’g tulo ka sunodsunod nga kadaugan gamit ang ilang depensa nga nagpasaka sa ilang rekord sa 3-2.
“When we lost to Meralco (Bolts) we went back to basics,” asoy ni Alaska coach Jeffrey Cariaso, kinsa nagtumbok sa katapusang higayon nga nakatilaw og pilde ang Aces.
“We talked about our defense. We talked about how to improve on it,” dugang ni Cariaso nga napatik sa www.pba.ph.
“We want to have that understanding that going to every game our defensive mind-set must be strong.... The emphasis was really on our defense.”
Gipakita sa Aces nga naka-adjust na sila sa pagkawagtang sa usa sa ilang mga sinaligan nga si Kevin Racal, kinsa nakasinati og angol (torn ACL) sa labing una pa lang duwa sa Aces sa bubble.
Ang Beermen dako pa’g kinahanglang himuon nga adjustments gumikan kay gawas nga daan nang wala sa ilang kiliran ang higanteng Sugboanon nga si JuneMar Fajardo, kinsa padayon pang nagpaalim sa iyang angol sa tiil, nabalian sila’g dugang nga haligi.
Gitumbok mao si Terrence Romeo, kinsa nakasinati og angol sa abaga sa dakong kapildihan sa Beermen batok sa TNT Tropang Giga, 88-107, sa miaging semana.
Hinuon sa labing ulahi nilang duwa, gipakita sa Beermen nga aduna gihapon sila’y saktong ikabuga ug ilang gipangbuntog ang Terrafirma Dyip, 105-98. Ang Beermen adunay 2-2 nga rekord.
Ang Aces nasayod nga bisan wala sila si Fajardo ug Romeo, dili gihapon mabangbang ang puwersa sa Beermen hinungdan nga gipangandaman kini nila’g maayo.
“First, SMB will showcase their experience and heart despite being without Romeo and JMF. They still have lots of talent there and we expect them to be at their best,” batbat ni Cariaso.
Ang Beermen ni coach Leo Austria magsalig og maayo nila ni Arwind Santos, Marcio Lassiter ug Alex Cabagnot aron paandaron ang ilang opensa apan magkinahanglan sila og dakong suporta gikan sa ilang mga kauban.
Sa premirong duwa, magsangka ang parehong wala pa’y daog nga mao ang Terrafirma Dyip ug NorthPort Batang Pier.
Ang Dyip adunay 0-3 nga rekord samtang ang Batang Pier naggunit og 0-4 nga baraha.
Gilaumang ipagawas sa Dyip ug Batang Pier ang tanan nilang ikabuga ning higayuna aron dili motiglom og samot ang ilang paglaom sa sunod round.
Ang Dyip ug Batang Pier mao na lang ang wala nakatilaw og kadaugan sa komperensiya.
Ang mopatigbabaw nga walo ka teams ang makaabante sa sunod round. /ESL