Modul-an na sa usa ka bulan sukàd gibuksan ang klase sa mga publikong eskwelahan ubos sa new normal nga sitwasyon. Gilan sa pagsugod hangtod karon way puas ang mga reklamo batok sa sistema sa edukasyon nga gipatuman sa Department of Education taliwala sa pandemya.
Basaha ang mga komento sa social media. Pulos saway. Way nidayeg. Gani napasanginlan pa nga naka apekto sa pangisip sa ubang kabataan nga niresulta og dili maayo. Apan alang sa Grade 8 nga si Jemar Lastimosa, inay magreklamo gidasig niya ang iyang kaugalingon pag-atiman sa mga module kutob sa iyang mahimo.
Nagkaila mi ni Jemar karon lang semanaha samtang nga nanuroy siya og linung-ag nga sweet corn sa dakbayan sa Sugbo. Gikan pa siya sa ilaha sa Lagtang siyudad sa Talisay diin nahimutang ang Lagtang National High School nga maoy iyang eskwelahan. Siya maoy kinamagulangan sa lima ka managsoon.
Nagtrabaho sa construction ang iyang amahan. Samtang ang iyang inahan naninda og prutas isip abag sa ilang inadlaw nga panginahanglan. Asoy ni Jemar, kinahanglan nga manuroy siya og sweet corn sanglit di mapaigo ang kinitaan sa iyang ginikanan alang sa ilang pamilya. Samotan pa sa pandemya kinahanglan gyud kaayo ang dobling paningkamot.
Samtang na-busy ang ubang tinum-an tobuok adlaw pagtinubag sa ilang module, si Jemar tua sa karsada nagpasingot paglukdo sa iyang sweet corn. Iyang gibahin ang iyang oras. Sa adlawan siya manuroy. Unyag ka gabii na siya mag-atiman sa nagtipun-og nga module. Maayo unta kong ang iyaha rang module ang iyang atimanon. Naa pay mga module sa iyang mga manghod nga nagtungha sa elementarya nga iyang sulbaronon. Pagkapait nga kinabuhi. Alang kang Jemar, way atrasay kay pagbuot sa kapalaran.
Mag-usa na ka semana ugma ang trahedya nga nikalas og tulo ka kinabuhi sa dakbayan sa Sugbo. Ang grabing baha nga nasinati nga hangtod karon padayong gilalisan sa mga opisyal sa gobyerno maoy responsable sa ilang hinalaling kamatayon. Pastilan. Puwerte natong amping nga di matakdan sa covid19, apan diay baha nga resulta sa kakuwang sa pagpakabana sa mga hingtungdan mao ray makapatay nato.