Ang kamatuoran nga kitang tanan padong sa katiguwangon di mapugngan kay wa may exempted nato ini bisag unsa pa ka sapian o ka daghan nagparituki ug inat sa panit.
Let’s face it and accept it, apil ang mga kakulian nga resulta sa atong mga binuhatan sama sa mga sakit-sakit og luya sa lawas maong kung motungtong na gali sa 60 ang edad, officially senior Citizen ka na.
Dapat kining ikalipay ug ipasalamat sa nagbuhat nato kay di biya tanan makalahutay og abot ining edara.
Mao sab ning panahuna nga angay ng mo-focus sa pag-enjoy kuyog sa mga pinalangga ug minahal sa kinabuhi kay maihap na lang ang nahabiling panahon dinhi sa yuta. Undanga na ang pagsige og pangulekta og butang kay di man gihapon ni nimo madala sa imong lubnganan.
Panahon na nga gamiton nimo imong hinaguang tinigom para magsuroy-suroy o biyahe, kung maka afford, sa mga lugar nga gusto nimong makita og maabot para maglingaw-lingaw ug lulinghayaw.
Ayaw na pagsige og hipos anang imong kwarta kay mao ra nay awayan unya sa sa imong mga anak o paryente kung mopanaw ka na. Pagbilin lang sab og igong kantidad para palit sa imong maintenance nga tambal o pagpadoktor.
I-enjoy imong mga apo apan ayaw pakamatya imong kaugalingon sa kakapoy ug kahago sa pagbantay o yaya ini nila kay di na ni nimo obligasyon. Busa, ayaw ka konsensiya. Ang imong responsibilidad ang pagpadako og sakto sa imong mga anak, di apo, gawas kung naay kakulian nga di kapugngan.
Angay nga dawaton aning panahuna nga medyo hinay na ang panlihok-lihok unya motukar na sab ang mga sakit-sakit sa kalawasan sama sa arthritis, rayuma, high blood pressure og diabetes. Maong hinay-hinayi na lang ang lihok unya ayaw pasubrahi og gamit imong kusog basi sa imong kasarang ug enerhiya.
Kaon sa imong mga gusto ug paboritong pagkaon basta di lang sab palabihan og kanunayon.
Undanga na ang kinabaw nga panrabaho. Pahuway na unya og manrabaho man gali, mas maayong part- time, part- time na lang aron di ma stress ug mahago.