SUPERBALITA CEBU

Anak ‘nagdumot’, mipatay sa amahan

PATAY ang usa ka amahan human gipusil makaduha sa iyang anak alas 9:45 sa gabii sa Huwebes, Oktubre 22, 2020 sa Purok Ipil-Ipil, Barangay Rizal, lungsod sa Pinamungajan, habagatang Sugbo.

Si Victoriano Caraqui-an, 64, pensiyonado, namatay sa Pinamungajan District Hospital human nakaangkog samad pinusilan sa walang dughan nga milapos sa tuong buko-buko.

Gipusasan si Simon Caraqui-an, 34, ulitawo, welder, kinsa nadakpan sa hot pursuit operation sa kapulisan.

Gi-turnover sab sa kabanay ang .22 caliber revolver nga maoy gigamit pagpusil.

Si Police Corporal Michael Vincent Balicoco sa Pinamungajan Police Station nga nahinabi sa Superbalita Cebu, nagkanayon nga sila si Victoriano ug Simon uban sa kahigalaana nagtagay sa ilang balay.

Sa paghubog na, nagkalalis ang amahan ug anak nga niresulta sa sinukmagay.

Mihuboy ang mata ni Simon dihang naigo sa kumo sa iyang papa.

Ang duha giuwang sa mga kabanay ug silingan, dayon nisulod si Simon sa balay.

Nigawas og balik si Simon ug gipusil niya makaduha kahigayon iyang amahan, kinsa naigo sa walang dughan makausa.

Nisibat si Simon, apan wa magdugay nadakpan.

Samtang si Victoriano gidala sa tambalanan apan namatayi.

“ Karaan naman daw ni ilang bangi kaniadto pa sila nga kon magtagay mag-away. Maorag nagdumot ning anak,” dugang ni Balicoco.

Dugang nakuhang impormasyon sa kapulisan ang amahan gikatahong kanunay magmaoy, manapat kon mahubog.

Kasong parricide ang giandam sa kapulisan nga ipasaka batok kang Simon.

GIDUNGGAB

Patay ang usa ka silingan human gidunggab sa usa ka senior citizen sa Barangay Tingub, Mandaue City ala una sa kadlawon sa Biyernes, Oktubre 23, 2020.

Giila ang suspek nga si Ernie Tilo Colon, 60, single, nag-abang og balay sa Barangay Tingub, Mandaue City.

Matod ni Police Chief Master Sergeant Michael Limalima, desk-officer sa Casuntingan Police Station, nga nakadawat sila og taho gikan sa mga silingan nga adunay gidunggab sa ilang lugar ug daling miresponde ang ilang mga kauban sa lugar.

Nakit-an nalang ang biktima nga si Jomar Disoasedo Dinglasa, 34, silingan sa suspek, nga patay na nga adunay sobra sa 10 ka mga samad dinunggaban.

Daling gisikop sa iyang mga kauban si Colon.

Sa ilang inisyal nga imbestigasyon, gilambos ni Dinglasa ang gate sa ilang giabangan nga lugar hinungdan nga nakamata si Colon.

Gikomprontase ni Colon si Dinglasa nga miresulta sa panaglalis. / GPL, KFD


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph