SUPERBALITA CEBU

P100K premyo sa no-Covid barangay

ANG Cebu City Government mohatag og tag P100,000 isip financial incentive sa matag barangay nga way matala nga positibong kaso sa coronavirus disease (Covid-19) sugod sa Nobiyembre 1 hangtod Disyembre 31, 2020.

Kini ang gipahibawo ni Mayor Edgardo Labella, usa ka adlaw human nibisita si Environment Secretary Roy Cimatu, overseer sa Inter-Agency Task Force (IATF) sa Covid response sa Dakbayan sa Sugbo.

Iyang gidayeg ang liderato ni Labella sa pagpakigbatok sa virus. Sa pagduaw ni Cimatu, iyang naobserbahan ang pagtibugsok sa gidaghanon sa bag-ong mataptan.

Iyang nakita nga kanunay daghan ang mangaayo itandi sa bag-ong matakboyan sa sakit sulod sa duha ka buwan hinungdan sa grabeng pagkunhod na sa aktibong kaso.

Ang kalihim sa Department of Environment and Natural Resources (DENR) nihagit sa mga opisyal sa dakbayan, labi na kang Labella nga himuon nga zero case ang Cebu City sa umaabot nga buwan.

Gumikan niini, inisyal nga lakang ni Labella mao ang paghatag og insentibo sa mga barangay nga way bag-ong kaso nga marehistro sugod sunod buwan.

“In that direction, I am announcing today that the City Government of Cebu will give an incentive to any barangay in the City of Cebu that can register zero Covid case starting November 1 to December 31. An amount of P100,000 for each and every barangay that will have a zero record of Covid case,” padayag ni Labella.

Sa kasamtangan, ang Cebu City aduna nalay 197 ka aktibong kaso sa Covid gikan sa kapin 8,000 ka kaso dihang nidas-ag ang nangatakdan dinhi niadtong Hunyo ug Hulyo.

HAGIT

Gidawat sa hepe sa Police Regional Office 7 ang hagit ni Cimatu human kini nakadayeg sa pag-ubos na sa gidaghanon sa mga kaso.

Matod ni Police Brigadier General Albert Ignatius Ferro nga dako nga hagit nga himuong zero ang active cases, apan ilang dawaton sanglit positibo siya nga makab-ot sa mga Sugboanon pinaagi sa pagtinabangay nga di na motakod ang virus.

Iyang gipasabot nga mobalik sila sa naandan nilang gihimo sama sa estriktong pagpatuman sa minimum health standard ug paghingusog pa sa contact tracing aron ma-isolate dayon kadtong nagpakita sa simtomas sa virus.

WAY KASO

Moabot sa 10 ka mga barangay sa Dakbayan sa Lapu-Lapu ang way aktibong mga kaso sa Covid-19 hangtod sa Oktubre 22. Mao kini ang gipahibawo ni Grace Mary Carungay,epidemiological and surveiilance unit officer sa kagamhanan.

Base sa talaan sa City Health Office sa Oktobre 22, wa nay aktibong kaso sa Covid-19 mao ang Brgy. Pusok, Subabasbas, Tingo, San Vicente, Talima, Caw-oy, Baring, Sabang, Tungasan, ug Caohagan. Sa maong mga barangay, bugtong ang Subabasbas ug Pusok ang anaa sa mainland samtang ang uban mga barangay na sa isla sa Olango.

Nagpabiling adunay labiong daghang aktibong kaso sa pagkakaron mao ang Brgy. Calawisan nga may 12, Basak nga adunay 10, Gun-ob nga may unom, Pajo ug Babag nga tag lima ug Poblacion nga may upat. / PAC, AYB, GCM


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph