GITUGUTAN na sa gobiyerno nga mabalik sa kadalanan ang mga motorcycle taxi services isip pagpadayon sa pilot study niini.
Si Presidential Spokesman Harry Roque nagkanayon nga mitugot na ang gobyerno kabahin niini.
“Also approved is the resumption of the motorcycle taxi pilot study, which would be implemented and monitored by the National Task Force Against COVID-19 and the Department of Transportation,” matod ni Roque niadtong Biyernes, Oktubre 23.
Lakip sa gitugotan sa Land Transportation Franchising and Regulatory Board (LTFRB) sa motorcycle taxi pilot study ang Angkas ug JoyRide.
Giklaro sa LTFRB nga kinahanglan pa sila moisyu og guidelines kabahin niini.
“Yes, we’ll just wait . The plan is to resume the test run in order to finalize the stand whether they will be allowed and repeal RA 4136 or not,” matod ni LTFRB 7 Regional Director Eduardo Montealto Jr.
Ubos sa Republic Act (RA) 4136 o ang Land Transportation and Traffic Code, gidid-an ang motorsiklo nga gamiton isip pampasaheroan.
“Private motorcycles, scooters or motor wheel attachments...shall not be used to solicit, accept, or be used to transport passengers or freight for pay,” ubos sa Section 7 sa maong balaod.
Ang pilot study naghatag og kahigayonan sa Angkas ug JoyRide nga mopadayon sa ilang serbisyo samtang ang mga magbabalaod nagtuon sa balaudnon kon himuon ba kining legal o dili.
Ang Angkas ug JoyRide alternatibo nga transportasyon sa pipila ka dapit sa nasod lakip na ang Sugbo tungod kay gawas sa barato, mas maayong sakyan tungod sa kahuot sa traffic. /