SUPERBALITA CEBU

Babaye gi-chopchop

IGO lang unta mamana og pantat sa sapa ang duha ka mga batan-on nga sila si Reymart Villegas ug Nico Canoy sa Sabado sa buntag, Oktubre 24, 2020 sa sapa ubos sa taytayan sa Barangay Talamban, Siyudad sa Sugbo.

Samtang sila namana, ilang nakita ang usa ka putos nga ilang gituohang sako nga nagburot. Ang duha nanguryoso, ilang giduol aron susihon unsay sulod.

Ila kining gibira sa daplin aron mahilayo sa sulog sa tubig dayon ilang gibuslotan. Dako nilang katingala nga lawas sa usa ka babaye ang ilang nakita ug nanimaho na.

Dali sila nga nidagan aron mopahibawo sa mga opisyal sa Barangay Talamban ug kapulisan sa ilang nakaplagan.

Matod nila nga wa na sila makalahos og pamana og pantat nga mao unta ang ilang ipulotan kay naglain ang ilang ginhawaan sa ilang nakita.

Si Police Captain Jonathan Taneo, hepe sa Talamban Police Station nga nahinabi sa Superbalita Cebu, nibutyag nga sa kasamtangan,wa pa nila kini mailhi.

Bisan tingali ang mga kabanay maglisod pag-ila kay ang lawas nagkadugta na, way ulo, mga kamot ug tiil kay gipamutol.

“Lawas ra ang nakit-an. Walay ulo, walay mga kamot, tiil ang maong babaye. Nagkadugta na usab ang parte sa iyang kalawasan,” matod ni Taneo.

Dugang ni Taneo nga dunay duha ka tawo nga niduol kanila didto sa nahitaboan aron mosusi kon basin ilang paryente ang napalgang patay, apan wa makahimo tungod sa kabaho.

“Usa sa among buhaton, Sir, is ang pag-trace sa sapa, Sir, kay basig kaluy-an (sa Ginuo). Sa ibabaw, Sir, wa to (ubang parte) malahos og kaanod if giapil tog labay sa sapa po ang ubang parte sa lawas sa biktima po,” matod ni Taneo.

Ang Scene of the Crime Operation (SOCO) personnel sa ilang pag responde sa lugar way nakita nga mga posibleng ebidensiya nga ang maong lawas mailhan gawas lang sa kadtong trapal nga maoy giputos sa lawas.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph