SA DILI madugay, ang Commission on Higher Education (CHED) mopagawas na unya og mga lagda nga sundon sa mga collegiate athletes sa ilang training.
Kini human nga giaprobahan na sa Inter-Agency Task Force ang resolution nga nagtugot na sa mga student-athletes nga makapahigayon sa ilang training.
Niadtong Martes ang chairman sa CHED nga si Prospero de Vera III ug ang Commission en banc gikatakdang magtagbo aron pagtuki sa mga rules nga istriktong ipasunod human makapahigayon og public consultation.
“Within the week I should be able to issue the guidelines for training ng collegiate athletes,” pagbutyag ni De Vera.
Gitug-an ni De Vera nga sa dihang giaprobahan na sa IATF ang resolution, dali gilayon siyang nagporma sa technical working group. Iyang gilakip ang Philippine Sports Commission (PSC), Games and Amusement Board ug ingon man representatives sa University Athletic Association of the Philippines (UAAP) ug National Collegiate Athletic Association (NCAA).
Tungod niini, ang UAAP ug NCAA misugod na usab paghulma sa ilang kalendaryo alang sa ilang mga kalihukan.
Ang NCAA pananglitan, mosugod sa ilang bag-ong season sa sayong bahin sa tuig 2021 ubos sa pagtugot sa gobiyerno. Apan ning higayona, upat ra ka events ang ilang ipahigayon - basketball, volleyball, swimming ug track and field.
Dunay plano nga ilakip ang e-sports ug ang online chess exhibition.
Ang UAAP, sa ilang bahin, naglaraw sa bulan sa Enero sunod tuig ang opening sa ilang ika-83 nga season. Niadtong Abril ning tuiga, hingpit na nilang gikanselar ang ilang ika-82 nga season.
Sukwahi sa NCAA nga upat ra ka events ang pagatigi-an, sa UAAP ipahigayon gyud ang 15 ka events. Ang Cignal TV/One Sports mao nay ilang official nga broadcast partner human sa pagkawagtang sa ABS-CBN.
So, at least, aduna nay anino sa hinayhinay nga pagbangon sa amateur sports sa nasod ilabi na ngadto sa atong mga student-athletes.
Pero dinhi sa atoa, ambot og unsa ka tinuod nga posibling sa tuig 2022 pa moaktibo og balik ang Cebu Schools Athletic Foundation, Inc. (Cesafi).
Gani dunay mga eskuwelahan nga sakop sa Cesafi ang wala na mangulekta og athletic fee sa niaging enrolment, matod pa sa tinubdan.
Pero nagpabilin sa gihapon ang scholarship sa mga athletes apan posibli nga temporaryo lang una nilang ihunong ang pagpanawat og mga atletang estudiyante.
Niini, napanglantawan nga daghang mga atleta ilabi na kadtong mga adunay igong abilidad ang manimpalad didto sa Kaulohan.
Ang katong walay sarang ikagasto, maghuwat lang ta sa 2022, kana kon di mausab ang hunahuna sa atong mga kadagkuan sa Cesafi. (jun.migallen22@gmail.com)