HUMAN kaduha nauswag ang petsa sa ilang kasal, sa katapusan natuman gyud ang gipangandoy nga wedding nila ni Rommel Vincent “RV” ug Mary June “MJ” Villasawa-Enriquez.
Ang ilang kasal naatol sa birthday ni Mama Mary niadtong Septiyembre 8, 2020 sa Archdiocesan Shrine of Saint Pedro Calungsod sa siyudad sa Sugbo.
“Malipayon mi nga bisan sa pandemic, it was made possible because of her intercession,” sigon ni RV.
Una unta gitakda ang ilang kasal niadtong Mayo 28, 2020 ug dayon pagka Hunyo 30, 2020. Apan nasibog gumikan sa krisis sa Covid-19.
Matod ni MJ, sa sinugdanan nagtuo siya nga sayon lang ang pagpangandam sa ilang kasal.
Samtang nagpadayon ang preparasyon sa ilang kasal, nakabati og kasakit si MJ kay nipaso siya padung sa altar nga way bisan usa ka miyembro sa immediate family atol sa ilang kasal.
Excited unta ang mga igsuon ni MJ sa iyang kasal labi na sa ilang sul-ubon nga mga sinina.
Wa makatabok ang mga ginikanan ug mga igsuon paingon dinhi sa Sugbo gikan sa Guihulngan City, Negros Oriental tungod sa quarantine status.
“Now the least thing I can do for my family as of this very moment is to tell the world that I am very proud of them. I am very proud of my parents bisan sa among pagka mag-uuma, bisan sa among kalisod...,” pahayag ni MJ.
Bisan kon way immediate family member nga nakatambong sa kasal ni MJ, mapasalamaton siya nga naa ang iyang suod nga mga higala, mga kauban sa trabaho ug pamilya ni RV.
“They’re like family to me. Swerte kaayo ko kay tagsa kaayo makakita og higala who would willingly spent their time and effort apil na kwarta just to assist us,” dugang ni MJ. (SCG)