Binasi sa Exodo 22:20-26; Salmo 18; 1 Taga-Tesalonica 1:5-10; Mateo 22:34-40
Aron dali mahurot ang mga “stocks” sa usa ka butang nga igbabaligya, may mga tindahan nga mo-“advertise” og “buy one, take one”. Palit og usa, ug makadawat ka og ikaduha nga libre. Himuon ni nila aron mahurot ang mga karaang “stocks” ug bawion na lang nila diha sa gidaghanon nga paliton sa maong butang. Makaengganyo bitaw niining paagiha kay daw makadaginot kita. Sa tinuoray, nay mga tawo nga bisag wala gikinahanglan ang maong butang, mopalit og daghan niini kay lagi “buy one, take one”.
“Magtutudlo, unsang kasugoan diha sa Balaod ang labing dako?” nangutana ang usa nga batid sa balaod kang Jesus. Ang tubag ni Jesus susama sa “buy one, take one”: “‘Higugmaa ang Ginoo nga imong Dios sa tibuok mong kasingkasing ug sa tibuok mong kalag ug sa tibuok mong hunahuna’...Ug ang ikaduha sama niini, ‘Higugmaa ang imong isigkatawo sama sa imong kaugalingon’”. Gidugtong ni Jesus ang gugma alang sa Dios ug ang gugma alang sa isigkatawo.
Mapamatud-an ang pagkatinuoray – o pagkamini – sa atong gugma sa Dios ug sa isigkatawo diha sa pagsubay sa atong gugma ngadto sa paris niini. Pananglit, kon moingon kita nga nahigugma kita sa Dios apan wala kitay paghigugma sa atong isigkatawo, ilabina ang mga nanginahanglan, mini ang atong gugma alang sa Dios. Kon moingon pod kita nga nahigugma kita sa atong isigkatawo apan wala kitay paghigugma sa Dios, tawhanong gugma lamang kini ug lagmit masagulan og dili maayong tumong sama sa tawhanong ideyolohiya o manipulasyon.
Kinahanglan magdungan kining duha ka gugma kay usa ra kini sila. Apan dili kini “buy one take one” sa patigayonan nga pagsabot. Walay makuha ang Ginoo kanato sa atong paghigugma kaniya. Alang lamang kini sa atong kaayohan. Makaplagan kini nato sa libro sa Exodo: “Ayaw ninyo palabilabihi o daogdaoga ang usa ka langyaw, kay kamo usab mga langyaw man kaniadto didto sa Ehipto...Kon daogdaogon ninyo sila, tabangan ko sila inigpakitabang nila kanako...Maminaw ako kay ako mapuanguron”.
Bisan diay sa Karaang Kasabotan makita na ang kadugtongan sa gugma sa Dios ug sa gugma sa isigkatawo. Dili ta mahimong modaogdaog sa uban unya paandayonan lang kita sa atong Langitnong Amahan. May tulobagon kita.
Usa sa mga paagi sa konkretong pagdugtong sa maong duha ka gugma mabasa nato sa sulat ngadto sa mga taga-Tesalonica. Gisugdan kini sa pagpasalamat ni San Pablo sa ilang “buhat sa pagtuo” ug “pagbudlay sa gugma” nga nakahimo nilang ilado sa ubang mga Kristohanong katilingan. Namunga ang pagsangyaw sa maayong balita ni Pablo ngadto kanila nga inubanan dili lamang sa pulong kondili sa gahom ug sa espiritu Santo. Kini diayng pagpaambit sa Kristohanong pagtuo usa ka akto sa gugma alang sa Dios ug alang sa isigkatawo.
Nadugtong na ba ang atong gugma sa Dios ug gugma sa tawo? Unsa may bunga niini?