NAKALITAN ko sa balita nga magtigi karon ang Megawide Construction Corp. ug ang CFI Community Cooperative tungod niining proyekto nga himuong modern na ang Carbon market.
Ang SM man gud unta to ang gibalita nga maoy interesado sa pag-develop sa Carbon market. Apan karong bag-o kalit nga niguwa nga di na diay ang SM. Ang Megawide na. Di man kini basta-basta ang Megawide kay mao man kini ang naghimo sa bag-ong terminal sa Mactan-Cebu International Airport.
Dihang nakahibawo ang CFI Coop niini, nagpakita sab ang maong kooperatiba og interes nga maoy mo-develop sa merkado. Tuyo niini nga mosumiter og counter proposal sa unsolicited proposal sa Megawide.
Ok ra man kini unta. Apan, nireklamo sa miaging semana si Winston Garcia, ang presidente sa CFI Coop, nga wala gipakita kanila ang Joint Venture Agreement (JVA) sa Joint Venture Selection Committee (JSVC) bisan og nakabayad pa kini alang sa maong mga dokumento. Gani, nibahad ang CFI Coop nga kon di gyud ipakita kanila ang maong dokumento, mapugos kini sa pagdangop sa korte.
Nah, angayang magmatngon ang Cebu City Hall niini kay sweto ra ba kaayo og kiha-kiha kining mga Garcia.
Ang inisyal nga plano sa CFI Coop ila nang gipadayag ngadto sa Cebu City Council atol sa Citizen’s Hour sa miaging Oktrubre 21, 2020.
Ang nakaapan lang kay wala pa maka-endorse ang JSVC sa maong joint venture agreement ngadto sa Konseho. Busa, sa pagkakaron, plano sa Konseho nga tawgon ang JSVC aron makataho kini sa kalamboan sa proyekto.
Ang ako lang, makatingkag sa dunggan nga ni-enter sa proyektong pagpalambo sa Carbon market ang Megawide ug ang CFI Coop.
Sa una pang bahin, unsa may tuyo sa Megawide? Gusto ba kining makapanag-iya na og negusyo nga supermarket? Buot ba ipasabot nga i-privatize na ang Carbon market?
Sa laing bahin, tuyo na ba karon sa CFI Coop nga mosulod og negusyo nga construction dayon magdumala og mercado? Naay nakaistorya kanato nga wa ra bay track record sa contruction business ang maong cooperatiba.
Politika
Apan makapaintriga kanako ang pagsulod sa pamilya ni Winston Garcia ug ni Gob. Gwen Garcia sa Sugbo. Wa ba kaha kini silay plano sa politika labi na karon nga daw huyang na si Mayor Edgar Labella? Nakaingon ko nga huyang kay gawas sa iyang performance batok sa Covid-19, daw gibiyaan na kini sa mayor-mayor nga tua na magtutok sa Syudad sa Bacolod.
Alegre man gud kining performance ni Mayor Labella kabahin sa Covid-19. Iya nang giangkon ang mas maayong kahimtang karon sa syudad.
Apan kahinumduman, si DENR Secretary Roy Cimatu baya ang nianhi sa Sugbo aron matabangan intawon ang mayor. (@anol_cebu sa Twitter)