GIHAGIT ni Environment Secretary Romy Cimatu si Cebu City Mayor Edgardo Labella nga himuong zero ang aktibong mga kaso sa coronavirus disease (Covid-19) sa Dakbayan sa Sugbo. Agig tubag sa hagit, gipahibawo ni Labella ang ganting P100,000 sa matag barangay nga mag-zero sa aktibong mga kaso sa Covid sugod sa Nobiyembre 1 ngadto sa Disyembre 31, 2020.
Pagkakaron, dunay 40 kapin na ka mga barangay sa dakbayan nga wa nay aktibong mga kaso sa Covid. Ang aktibong mga kaso naa na lang sab sa 197. Makab-ot kaha ni? Nagtuo si Labella nga makab-ot ni kon padayong mosunod ang mga Sugboanon sa health protocol.
Daghan na gung mga adlaw nga single digit ang gidaghanon sa infections. Mas daghan na sab ang nangaayo.
Sa kamaayo na sa sistema nga gipatuman sa Emergency Operations Center (EOC) nga gipangulohan ni deputy chief implementer Joel Garganera, dako kaayo ang posibilidad nga makab-ot ang zero transmission sa mga barangay.
Makita na usab ang kaestrikto sa kinabag-an sa mga establisemento nga nituman sa mga rekisitos sa pagpatuman sa mga health protocol. Way makasulod sa mga establisemento kon di ka mosuwat sa contact tracing form, face mask ug face shield. Kuhaan ka pag temperatura.
Kanunay usab nga nagpatrolya sa mga barangay ang Task Force Kasaligan aron pagpatuman usab sa health protocol. Duna gihapoy nangandakpan kay wa motuman.
Kon diha pa lang sa komunidad nagtuman ug nanagana na ang usag usa nga di matakdan, moabot ra ang adlaw nga mag-zero transmission sa Dakbayan sa Sugbo. Mabuntog ra ang Covid kon ang tanan magmatangon, mapanagan-on ug dunay kooperasyon.
Hayan di pa gani moabot ang bakuna batok sa Covid-19, wa nay matakdan sa mao nga kagaw. Basta ang usa di lang mokompyansa, molugak sa pagbantay aron makalikay sa pagtakod sa kagaw. Basta di mokompyansa, di imposible ang Covid-free.