BALIK na sa pagdawat og mga transaksiyon ang tulo ka mga police community precinct sa dakbayan sa Talisay sugod sa Sabado, Oktubre 24, 2020.
Kini maoy gipahibawo sa hepe sa Talisay Police Station, Police Major Gerard Ace Pelare, nga niseguro sa publiko nga mahimo na nga direktang magpatabang ang mga lumolupyo kon duna silay gustong parespondihan sa kapulisan.
Si Pelare maoy nangulo sa kalihukan inubanan sa mga kapitan sa Barangay Lawaan 1, Tanke ug Bulacao.
Matod pa ni Pelare nga ang tulo ka police community precinct gihimo og temporaryo nga barracks o lugar diin makapahuway ang kapulisan samtang gihugtan ang lockdown sa pipila ka lugar sa dihang nagsugod ang pagkatap sa coronavirus disease (Covid-19).
Naapektuhan makadiyot ang operasyon sa Bulacao Police Community Precinct human pusila patay sa hepe ang iyang hinigugma ug pagkahuman naghikog usab siya.
Gisaad ni Pelare nga pagbalik sa operasyon sa tulo ka mga PCP, paspas na ang pagtubag sa alarma sa kapulisan sa dakbayan.
“The fight against Covid-19 will be maintained with QRTs (Quick Response Team) covering the interior portions of their AOR (area of responsiblity,” matod pa ni Pelare. (BBT)