USA sa 10 ka most wanted person nag-janitor pa sa usa ka mall, nadakpan pasado alas 4 sa hapon sa Biyernes, Oktubre 23, 2020 sa Parian Police Station human dunay nakahatag og impormasyon sa kapulisan.
Ang akusadong dunay kasong frustrated murder giilang si Jemcee Bulawit, 25, taga Barangay T. Padilla, Dakbayan sa Sugbo, apan nibalhin sa Dakbayan sa Lapu-Lapu aron motago.
Si Police Major Armando Labora, hepe sa Parian Police Station, niingon nga si Bulawit ilang nasikop sa usa ka mall sa Dakbayan sa Mandaue human nila makompirmar ang usa ka impormasyon.
Matod ni Labora nga si Bulawit nag-duty pa isip janitor ug maintenance sa mall ug wa makaeskapo sa ilang pag-abot.
Si Labora niingon nga si Bulawit dunay duha ka mga warrant of arrest sa duha ka mga kaso, usa niini frustrated murder nga naa sa sala ni Judge Stella Singco ug ang usa mao ang pagpamaligya og drugas.
Sa frustrated murder, ang korte nirekomendar og pyansang P200,000 apan way piyansa sa paglapas sa Section 5 ug Article 11 sa Republic Act 9165 kun Comprehensive Dangerous Drugs Act of 2002.
GIRONDA
Matod ni Labora nga si Bulawit ilang gironda niadtong Nobiyembre 2018, diin nakakuha sila og illegal drugs, apan nakasibat.
Sa iyang pag-eskapo, iyang gipusil ang kapulisan ingon man ang usa ka tiguwang lalake nga iyang gidudahan nga maoy nisumbong kaniya sa kapulisan. Ang biktima wa maintimano pagkaigo.
Ang pagpusil nakuha sa usa ka closed circuit television (CCTV) camera.
Sukad niadto, wa na siya mouli sa ilang balay sa T. Padilla, didto siya mitago sa Dakbayan sa Lapu-Lapu.
Nagtuo siyang wa na gipangita, ni-apply siya pagka janitor dihang wa pa siya malutsi og warrant of arrest.
Si Bulawit naa sa Parian Police Station gitanggong.
TUNGOD SA BIYUDA
Sa laing bahin, usa ka gidudahang drug pusher nga giilang si Michael Abay, 46, nasikop sa buy-bust sa Sawang Calero Police Station sa Biyernes, alas 11 sa gabii sa Sityo Mahayahay, Barangay Pasil, dakbayan sa Sugbo.
Si Police Major Eduard Sanchez, hepe sa Sawang Calero Police Station, maoy nangu sa buy-bust batok kang Abay.
Nasakmitan si Abay og ilegal nga drugas nga mobalor og P50,000 ug nakuhaan usab og .38 caliber revolver nga dunay duha ka mga bala.
Matod ni Sanchez nga si Abaysa dakbayan sa Lapu-Lapu nagpuyo human nga ilang namonitor ang pagpamaligya. Apan nibalik sa Barangay Pasil human nakarelasyon ang usa ka biyuda.
Nagtuo ang kapulisan nga tungod sa iyang gugma, nibalik sa Pasil si Abay, diin namaligya na sab siya og illegal drugs.