MGA tripolante sa usa ka barko nangayog pakitabang sa Philippine Coast Guard (PCG) human sila mapagngi sa makina samtang naglawig sa kadagatan mga alas 12 pasado sa udto sa Dominggo, Oktubre 25, 2020, sa Lapinig Island, President Carlos P. Garcia, silangan sa Bohol.
Matod sa taho sa PCG nga ang barkong MV Good Fortune nga dunay 16 ka mga tripolante nagkarga og mga sinakong semento gikan sa Dakbayan sa Naga, habagatang Sugbo ug padung sa Dakbayan sa Tacloban, Leyte.
Ang PCG niingon nga ang kapitan sa barko nisulti kanila nga samtang sila naglawig, nakasugat sila og kusog nga hangin ug dagko nga mga bawod.
Ang main engine napawong tungod sa pagsud sa tubig dagat ngadto sa deck sa barko.
Sa pagsuwat ning taho, ang MV Good Fortune nag-angkorahe sa Lapinig Island, Ubay, Bohol.
Ang PCG padung na sa ilang pag rescue sa mga tripolante. (REV, BBT)