Mga duwa karon
4:00 pm- Phoenix batok NLEX
6:45 pm-TNT batok NorthPort
Sa labing unang higayon sulod sa usa ka tuig ug tunga, makaduwa na’g balik si Calvin Abueva sa tahas sa Phoenix Super LPG Fuel Masters sa premirong duwa karong hapon batok sa NLEX Road Warriors sa Philippine Basketball Association (PBA) Philippine Cup sa AUF Gym sa Angeles City, Pampanga.
Miaging adlaw, gianunsyo sa PBA Commissioner’s Office nga gilibkas na niini ang indefinite suspension nga ilang gipahamtang ngadto sa gitawag of “The Beast” sa miaging tuig.
Ang pagbalik ni Abueva seguradong makadugang og kadasig sa Fuel Masters, nga kasamtangang naggunit og 3-2 nga rekord.
Kining maong kalambuan dili maayo sa habig sa Road Warriors, nga kasamtangang nagkagidlay dala ang 1-4 nga rekord.
Si Phoenix coach Topex Robinson nahimong emosyunal human niya nasayri nga gilibkas na sa PBA ang suspensyon ni Abueva.
Gipahinungod ni Robinson ang ilang makutas nga kadaugan batok sa Magnolia Ang Pambansang Manok Hotshots niadtong Biyernes, Oktubre 23, 2020 ngadto kang Abueva.
“Winning it for Calvin is really big for us. We don’t want to lose again and go back to the hotel knowing that Calvin wants to help us, and the best thing he can do is practice and cheer for us and pray for us,” matod ni Robinson nga napatik sa www.pba.ph.
Gipasabot ni Robinson nga grabe nga enerhiya ang hatod ni Abueva ngadto sa ilang puwersa ug mao kini ang kanunay nilang gipangita sa ilang matag duwa.
Ang PBA nanghinaot nga naleksyon na si Abueva ug dili na kini mobuhat og salaod nga makahatag og bati nga dungog sa liga.
“The PBA Commissioner’s Office has lifted the suspension of Calvin Abueva paving the way for the Phoenix power forward to rejoin his team and play starting Monday,” pamahayag sa PBA.
Sa main game, ang league-leader TNT Tropang Giga (5-1) makigbatok sa NorthPort Batang Pier. (ESL)