GIHAGIT ni Environment Secretary Roy Cimatu, ang Covid-19 response overseer sa Visayas, ang mga opisyales sa siyudad sa Sugbo nga mahimong zero ang mga kaso sa Covid-19 sa siyudad.
Giluwatan ni Cimatu ang maong hagit sa iyang pagbisita sa dakbayan niadtong Huwebes, Oktubre 22. Matod ni Cimatu, ang Cebu City nakapakunhod sa mga kaso sa coronavirus sud na sa pipila ka mga semana.
“I challenge a possible zero, because I was looking at the recovery versus new cases. If the recovery is more than the new cases, then it is decreasing already,” matod ni Cimatu.
Lab-as pa sa atong panumdoman nga gibalik ang quarantine status sa Cebu City ngadto sa mas istrikto nga enhanced community quarantine (ECQ) gikan sa Hunyo 16 ngadto sa 30. Ang mga Cebuano gitawag pa nga mga “gahi’g ulo.”
Apan karon, si Cimatu niingon nga ang Cebu City mao nay modelo sa ubang local government units sama sa Iloilo ug Bacolod. Apan ang target alang sa siyudad mao ang zero active case nga matod pa ni Cimatu mora’g imposible pero mahimo.
Sa natala sa Oktubre 22, ang active Covid-19 cases sa Cebu City 196 na lang, sa positivity rate nga 12.68 porsiyento. Ang siyudad adunay 10,188 ka konpirmadong Covid-19 cases, apan 9,313 ang nangaayo, sa recovery rate nga 91.41 porsiyento. Niabot sa 677 ang nangamatay.
Posible kaha ang hagit ni Cimatu nga mahimong zero active Covid-19 case ang siyudad sa Sugbo? Si Cebu City Mayor Edgardo Labella nitanyag na og ganti nga P100,000 sa matag barangay nga wa nay kaso sa Covid-19 nga natala.
Sumala sa Emergency Operations Center (EOC) sa Cebu City, sa ilang na-test, dunay 44 sa 80 ka barangays sa dakbayan nga wa makatala og bag-ong mga kaso sa Covid-19 sa nakalabay nga 14 ka mga adlaw. Sa ato pa, naa pay nahibilin nga 36 ka mga barangay.
Niadtong Hunyo, gihagit ni Cimatu ang barangay kapitan kay ang pandemic kausa ra motunga sa tibuok nilang kinabuhi. “This is your chance to show your leadership because this will not come again in your lifetime,” matod ni Cimatu. Apan kining hagit sa zero Covid-19 case hagit ni alang sa tanang Cebuanos.