HUMAN sa dul-an sa tunga sa tuig, gitapos sa mga pulis, sundalo, tanod, mga volunteer ug opisyal sa barangay ang ilang serbisyo sa checkpoint nga nahimutang sa Barangay Luyang, sakop sa lungsod sa San Remigio, amihanang Sugbo.
Ang maong checkpoint nga gitangtang sa miaging semana, gipabarug niadtong Marso 26, duha ka adlaw human gipailawom sa enhanced community quarantine (ECQ) ang tibuok Sugbo nianang Marso 28. Matod ni konsehal Regie Dahuya Jugan nunot sa kamanduan ni Gobernador Gwen Garcia pag-abli sa mga tourist destination sa tibuok lalawigan, nahukman nga ang checkpoint ibalhin ngadto sa Poblacion.
Siya niasoy sa daghang kasinatian nga dili makalimtan sa checkpoint sa ilang barangay nga nagsilbing monitoring sa mga tawo nga mosulod ug mogawas sa mga silingang barangay ug lungsod. Dili na niya matiman-an ang gidaghanon sa mga nibiyahe nga nasangu sa ilang checkpoint tungod sa kalapasan sa mga health protocol.
“Kasagaran mao kadtong nibiyahe nga gikan sa mga dapit nga gidid-an nga makasulod sa among lugar. Gumikan niini, gitambagan sila nga mobalik sa agi,” asoy ni Konsehal Jugan sa among panag-estorya sa cellphone.
Akong nasayran gikan niya nga ang mga wala makalusot mga suki ra sab sa mga nindot nga beach nga abunda kaayo sa maong bahin sa lalawigan.
Sa laktod, mga mangaligoay sa dagat ang kadaghanan nila. Wa man gyud itugot basi sa mga executive order nga giluwatan sa gobernador. Mao nga ang mga checkpoint maisip nga maoy panagang sa pagkuyanap sa coronavirus nga makapanakod.
Gawas nga did-an ang pagsulod lakip sab nga gibabagan kadtong magpataka og gawas nga kulang sa mga dokumento. Sa dul-an sa tunga sa tuig nga pag-operate sa checkpoint sa Barangay Luyang, daghang mga tawo ang gitumbok ni Konsehal Jugan nga angay pasalamatan tungod sa ilang sakripisyo ug mga tampo. Dunay nidonar og pagkaon para frontliners nga mga pulis, sundalo, tanod ug volunteers. May nitunol sab og tubig mainom.
Dakong buhi ang bayanihan spirit sa barangay sa mga bulan nga nangagi. Kinasingkasing nga pasalamat ang gitunol sa barangay nilang tanan nga sa nakalabay nga dul-an sa tunga sa tuig ang Luyang nahimo nilang ikaduhang pinuy-anan.
Si Konsehal Jugan nga maoy Chairman sa Peace and Order Committee, nipahibalo nako nga human giundang ang checkpoint niadtong Martes, mao na say gitutokan sa iyang 19 ka tanod ang pag-monitor sa kahusay ug kalinaw ilabi na kay nidagsang na sab ang daghang bisita ning panahon nga giablihan nag balik ang turismo sa lalawigan.
Nag-una mao ang padayon nga negosyo sa iligal nga druga. Isip puno sa ilang trabaho, gusto nakong isugyot kang konsehal ang tanod visibility diha sa highway aron mas sayon alang sa mga biyahedor pagdangop kon duna silay masugatan nga problema.