SIYAM ang angol, duha niini ang kritikal, sa panagbangga sa usa ka Ceres bus ug ambulansiya kagahapon, Oktubre 25, pasado alas 3:00 sa hapon sa General Maxilom Avenue eskina dan J. Divera sa Barangay Carreta, siyudad sa Sugbo.
Si Police Staff Sergeant Ryan Perez sa Traffic Patrol Group (TPG), usa sa unang niresponde sa hitabo, niingon atol sa interview sa mga sakop sa media nga ang ambulansiya gikan kini sa North Reclamation Area (NRA) ug nagsubay na sa General Maxilom Avenue paingon na unta pauli sa Chong Hua Hospital.
Samtang, ang Ceres bus gikan kini sa City Hall area ug paingon unta sa lungsod sa Liloan nga nagsubay sa dalan J. Divera paatubang sa Barangay Mabolo, siyudad sa Sugbo.
Matod ni Perez, sa nakuha niini nga mga detalye didto sa tambalanan, ang mga pasahero sa ambulansiya nga nadala sa Chung Hua Hospital giila nga si Carl Stephen Montenegro, 45, kinsa maoy drayber sa maong ambulansiya.
Samtang ang lain pa nga lima ka mga sakay sulod sa ambulansiya mao sila si Dr. Daryl Dakay, 32; usa ka internal medicine nurse nga si Princes Tion, 30, pasyente nga si Antonio Aguirre ug kauban sa pasyente nga si Merlinda Aguirre.
Samtang duha sa unom ka mga pasahero sa Ceres bus ang nakaangkon og samad ug bun-og sa lawas nga nadala sa pribado nga tambalanan sa dakbayan sa Mandaue nga sila Princess Besabella, 27, ug molupyo sa lungsod sa Consolacion; ug Ebith Lariosa, 26.
Ang drayber sa Ceres bus nga si Benedicto Calduzo ug konduktor niining si Leoret Sumalinog, pulos anaa karon sa Vicente Sotto Memorial Medical Center (VSMMC),
Si Sumalinog ang kritikal ang kahimtang human malabay sa gawas dihang nibangga sa poste.
Si Calduzo sa iyang pamahayag niasoy nga matod pa insakto lang ang iyang dagan ug tungod kay anaa man sa go signal ang signal light, siya milahos lang ug wala makabantay sa ambulansiya nga nagpadulong tungod matod pa niini ulahi na nadunggan ang sirena sa ambulansiya.
“Go signal man Sir, unya ulahi na siya nagpawangwang sa ambulansiya. Mao to nga ulahi na ang tanan..” pamahayag ni Calduzo.
Dugang niya nga wala na taymingan ra usab nga wala kini kasugat nga mga sakyanan hinungdan nga nadali niini paglahos sa poste sa Veco.
Ang sakay niadto nga pasahero nga si Ebith Lariosa matod pa wala na siya nakabantay kon unsay nahitabo ang iyang katapusang nakit-an ang ambulansiya nga anaa na sa iyang tungod mibangga.(BBT)