Dear Papa Joe,
Tawaga lang ko og Pedro, hingkod na, taga Lapu-Lapu City. Usa ko ka welder mao nga kon bakante ko, moadto ko og mga bar hangtud nailaila nako si Grace. Didto nagkasuod mi ug nagkarelasyon.
Niabot ang time nga nakahukom ko nga itipon siya para maundang na siya sa iyang trabaho kay nasayud ko nga di lang ako ang leon nga molapa sa karnero. Mao to nidagan og pipila ka buwan among relasyon ug namabdos siya. Pero nagduda ko kon ako ba ang amahan mao nag-away mi kay di ko kasalig niya nga wa na siya pahilabot og lain. Labina nga nasayod ang among mga silingan nga nagtrabaho siya kanhi sa bar.
Karon nilayas siya ug niuli daw sa probinsya. Niingon pa siya nga di ko paapason ug di niya ipaila ang bata nako. Apan gimingaw ko niya. Unsa may buhaton nako?
PEDRO
Pedro,
Kon modawat gani ta og tawo, dawata sa kinasingkasing, sama sa pagpalit og second hand nga butang. Nasayod ka nga magsunod ka sa guba niini mao nga andam ka unsay mahitabo.
Karon, tungod sa kahugaw sa imong huna-huna, nagtuo ka nga di imo. Apan what if imo? Kinabuhi sa bata ang imong gibutang sa kaluoy nga way ginikanan o di mapadako og tarong kay walay amahan. Ayaw padala sa imong pride. Kon nahigugma ka, dawata apan mabinantayon.
PAPA JOE
(para sa inyong tampo ipadala lang sa papajoesuperb@gmail.com)