GIPASIDUNGGAN ang retiradong heneral nga si Roy A. Cimatu, isip secretary sa Department of Environment and Natural Resources (DENR), sa Taiheiyo Cement Philippines, Inc. (TCPI) ug Solid Earth Development Corp. (SEDC) sa iyang pagbisita ni’ng bag-o pa lang.
Miagi siya sa planta sa pag-ari niya sa Sugbo aron mosusi sa reclamation project nga gitanyag sa Toledo City ug pagtuman sa iyang katungdanan isip overseer sa probinsya sa Inter-Agency Task Force on Emerging Infectious Diseases.
Gani, una niya nga gisusi ug gipani-iran ang mga protocol nga gisagop sa TCPI ug SEDC sa pag-atubang sa hulga sa coronavirus disease 2019 (Covid-19) sa inadlaw-adlaw’ng kalihukan sa duha ka mga kompanya.
“Gihangop nako ang inyong paghatag og kabalaka ug pag-alima sa inyong mga ginsakopan (nga sila) dili matakdan sa kagaw,” siya mipadayag sa iyang mensahe atol sa pagdawat niya.
Gitan-aw ni Cimatu ang mga kahimanan ug operasyon sa South Poblacion, San Fernando, samtang nipahimatngon siya sa mga nagdumala sa duha ka kompanya kabahin sa ilang mga polisiya nga may labot sa kinaiyahan ug programa alang sa kaugmaran sa katilingban.
Tigminahan ang SEDC og anapog ug kulon nga gamit sa TCPI sa paghimo’g semento, ug nagpadagan sa pantalan asa ikarga sa TCPI ang mga produktong Grand Cement nga ipadala sa nagkalainlaing dapit sa nasod.
Gipaambit niini kang Cimatu ang mga detalye kabahin sa paghiuli sa kanhi giminahan niini ug ang suporta nga nahatag niini sa National Greening Program sa DENR, lakip sa pag-ugmad sa SEDC-St. Augustine Eco-Pilgrimage Park didto sa Magsico.
Sa miaging tuig lang sa dihang naangkon sa SEDC ang ikaduhang Gawad Tugas alang sa responsibleng pagmina sa dinagkong kategoriya gikan sa DENR Central Visayas sulod sa lima ka tuig sukad masugdi ang maong pag-ila.
Gikutlo sa DENR-7 ang pasalig sa SEDC sa paghiuli sa kanhing naminahan niini, pagpaayo pa sa biodiversity ug pag-abag sa pag-ugmad sa mga komunidad.
Ang 2019 nga kadungganan nabaton nga usa ka “three-peat” human naangkon sa SEDC ang samang pag-ila sa 2017, samtang nabaton sab ni sa TCPI sa 2018 ubos sa kategoriyang pagproseso og mga minerales.
Sa 2016, naka-grand slam ang SEDC sa giisip nga ‘Oscars’ sa industriya sa mina sa nasod tungod sa pagkaangkon niini sa “Safest Quarry Operations” sa makatulo na ka tuig ug “Safest Mining Operations,” ang pinakataas alang sa usa ka minahan, ug “Best Mining Forest” pa gyud sa kategoriyang non-metallic.
Naangkon sab sa TCPI atol sa maong 2016 Safest Mines and Quarries Awards ang back-to-back nga merito sa pagpadagan sa “Safest Mineral Processing” sa kategoriyang tiggama’g semento.
Samtang napukan sa SEDC ang tanang minahang non-metallic sa pagbaton sa “Safest Mining Operations” sa 2016, naangkon sab niini ang “Safest Quarry Operations” award sa 2014, 2015 ug 2016.
Mipukan sab sa tanang mga pabrika sa paghimo og semento sa nasod, naangkon sab sa TCPI ang major award alang sa “Safest Mineral Processing” sa 2006, 2007 ug 2009, ug mga merito sa 2010 ug 2012.
Gitamod sa TCPI ang mga sistema sa pagdumala sukad 2005 nga ha-um ug nahi-angay sa sukaranan sa International Organization for Standardization (ISO) nga naka-base sa Geneva.
Naglakip kini sa ISO 14001:2015 alang sa environmental management (EMS), British Standard (BS) 18001:2007 alang sa occupational health and safety, ug ISO 9001:2015 alang sa quality management.
Nahiusa ang tulo ka mga sistema sukad 2006 sa usa ka Integrated Management System (IMS) nga giila sab nga nagtamod sa Certification International.
Nakatala ang TCPI nga labing unang planta sa semento lukop nasud nga nakabaton sa pagpamatuod nga nahaum ang EMS niini sa mga lagda sa ISO 14001.
Naangkon sab sa planta ang 1997 Business for Environment Award gikan sa Cebu Chamber of Commerce and Industry. (PR)