BISAN pa og unsaon. Bisan pa og matiguwang sud sa selda, di na mabalik ang gipang-invest nga kuwarta.
Kini ang sagad nga nasulti sa nga investors sa money investment scheme nga Rigen Marketing human niadtong Oktubre 22, 2020 gidala sa buhatan sa National Bureau of Investigation (NBI) sa Davao City gikan sa Metro Manila ang usa sa mga founder niini nga si Rico Garcia.
Utok sa maong marketing si Garcia. Nasikop sa otoridad sa miaging tuig gumikan sa mandu ni Pangulong Rodrigo Duterte nga puhagon ang mga nagpasiugda sa mga investment schemes sa Davao Region.
Daghan ang nasikop apan daghan sab ang wala, usa na niini si Kabus Padatuon (KaPa) International Founder Pastor Joel Apolinario nga hangtud karon gatago-tago, pero kampante ang mga miyembro niini sa ilang gibubo kay lagi, donation nila kadto.
Apan sa kaso sa ubang money investment schemes hangtud karon di pa mapapas sa hunahuna sa mga investors ang kalagot ug pagmahay.
Daghan na sab ang nakadawat sa hitabo kay lagi suma pa, nga niadto pa kuno, nasayod naman sila nga sugal kini. Busa, midawat sila.
Pero kadtong mga nangutang tawon ug namaligya sa ilang mga propedad, hangtud karon wa kadawat sa hitabo.
Dihang nasayran nga naa sa kustodiya sa NBI-Davao ang founder sa Rigen Marketing, taman nalang sa social media ang pagpabuhagay sa kalagot sa mga investors.
Usa lamang ang nahimong leksyon niini, mao ang pagkat-on nga sa sunod higayon di na magpahaylo sa susama niini nga matang sa pagpatubo sa kuwarta.
Nakat-on ang kadaghanan, butang nga maglisod na og pagtukod pag-usab ang susama niadtong mga pagpangilad.