NAGMINGHOY sud sa selda sa Talomo Police Station ang usa ka auxiliary police kay wa niya maguniti ang itlog sa biyuda nga gitinda.
Nasayran nga nasuko ang maong auxiliary police dayon nagmaoy kay gibalibaran siya dihang mangutang og itlog.
"Pautanga ko'g itlog Eva, pagunita ko anang imong itlog, kanang sa dughan nga itlog ba," alegasyong tipik sa giingon sa auxiliary police nga gisaysay sa nakasaksi sa hitabo.
Dihang nadungog sa reklamante ang giingon sa auxiliary police nasuko ang babaye, butang nga mitingkag sab ang dalunggan sa lalaki ug nasuko kini.
Sa maong takna, nagubot sila hinungdan nga nanawag og pulis ang reklamante dayon gidala sa presinto tres ug didto nasayran nga auxiliary police diay sa Talomo PNP ang maong nag-wild.
Pag-abot sa mga pulis, nailhan ang nahisgutan ug nakuha sa posisyon niini ang usa ka pusil ug mga buhing bala.
Sa kasamtangan, gibalhog karon sa selda ang nahisgutan ug giandam ang kaso nga ipasaka kaniya didto sa korte.