GIBANABANA nga walo ngadto sa siyam ka buwan nga puya napalgan sa labayanan og basura sa dump site area sa Barangay Inayawan, dakbayan sa Sugbo kagahapon sa buntag, Oktubre 25.
Si Police Major John Kareen Escober, hepe sa Pardo Police Station -7 nga nahinabi sa Superbalita Cebu, niingon nga pasado alas 8:00 sa buntag sa Dominggo, usa ka mamasurahay nga si Christopher Labalan, molupyo sa maong dapit, maoy unang nakakita sa puya.
Nasayran nga samtang namasura si Labalan, dunay usa ka box nga nagkadugo ang iyang nakit-an gikan sa usa ka garbage truck nga gipanag-iya sa barangay Mambaling, siyudad sa Sugbo diin gikan ang maong kahon nga dunay mga dugo.
Si Labalan nakugang dihang pagsusi niini sa maong kahon, usa ka puya nga walo ngadto na sa siyam ka bulan ang iyang nakit-an sa sulod niini hinungdan nga dali kini mipahibawo sa kapulisan. (BBT)