Task force sa kapulisan sa lalawigan umolon nunot sa pag-abli sa mga negosyo

MAG-UMOL og task force ang kapulisan ug ang kagamhanan sa probinsya sa Sugbo labot sa pagbalik na og bukas sa turismo sa tibuok lalawigan.

Ang task force maoy mopatuman sa tanang lagda sa Inter-Agency Task Force labot sa minimum health standard.

Naglangkob ang task force sa kapulisan ug sa mga barangay tanod ug ubang force multipliers sa probinsya sa Sugbo nga maoy mobadlong ug mosikop sa mga malapason sa health protocols.

Nag-viral karon sa social media ang hulagway sa mga mibisitang turista sa isla sa Bantayan lalawigan sa Sugbo nga wala mag sul-ob sa ilang mga face mask.

Ang kapulisan sa isla sa Bantayan gimandoan ni Police Colonel Aladdin Collado nga manakop sa mga tawo nga makalapas sa health protocol.

Ang masakpan nga wala mosul-ob sa ilang mga face mask ug face shield diha sa mga publikong lugar isyuhan dayon kinig citation ticket.

“Right now ang intervention natin kahapon pa kasama yung sa traffic enforcement unit ng munisipyo nag-iikot yung police with citation ticket, para pag makita nila kaagad, there is no questions they will issue a citation ticket even sa wala mag wear ng mask,” matod ni Collado.

Iyang gidugang nga wala pa luagi sa IATF ang health standard sa probinsya sa Sugbo nga nagpasabot nga dili mahimong mogawas ang mga tawo nga di magsul-ob og face mask lakip na niini ang social distancing.

Walay pili-on ang pagpanakop matod ni Collado ma langyaw man o local nga turista nga naa sa isla sa Bantayan.

Giklaro hinuon ni Collado nga mohimo pa silag sunod-sunod nga panag tigum uban ang buhatan sa Provincial Tourism Office aron maplantsa nila pag ayo ang pagpatuman sa task force sa tourists destination sa lalawigan sa Sugbo.

“We have to tune up muna siguro so that we could be of one direction,” dugang ni Collado.

Bisan nag-anam nag ubos ang kaso sa coronavirus disease 2019 sa probinsya sa Sugbo, matod ni Collado, dili pa gihapon kini kakompyansaan.

Kinahanglan ang pagbantay lakip na ang pagsul-ob kanunay sa ilang mga face mask lakip na sa face shield aron malikay sa virus.

Nasagmuyo ang Cebu Provincial Police Office (CPPO) officer-in-charge nga daghan pa ang malapason sa health protocols sa probinsya sa Sugbo sama sa lungsod sa Liloan diin daghan usab ang nangadakpan sa nanglabay nga mga adlaw. (AYB)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph