SUPERBALITA CEBU

Kamot, tiil nakit-an

TUMOY sa Ouano Wharf sa Barangay Looc, dakbayan sa Mandaue dunay nakit-an nga kamot ug tiil sa tawo niadtong Biyernes, Oktubre 23, pasado alas 12:00 sa udto.

Matod ni Police Major Aldrin Villacampa, hepe sa Station 5 sa Mandaue City Police Office (MCPO), ang maong wala nga kamot napalgan na dinha daplin sa dagat nga anaa na sa balas.

Ang punerarya nga gikontak sa mga pulis sa Station 5 wala modawat sa maong kamot nga nakit-an hinungdan nga nakahukom nalang kini nga ipalubong.

Samtang niadtong Sabado, Oktubre 24, pasado alas 11:00 sa buntag, didto gihapon sa susamang dapit apan didto sa karaang taytayan, usa na pud ka parisan sa tiil ang nakit-an apan dili masuta kon sa wala ba nga bahin o sa tuo nga tiil.

Ang maong tiil gipalubong ra usab dayon sa mga pulis tungod kay wala man gihapon modawat nga punenarya.

“Amo nalang gipalubong dayon. Dili man gud paris usa ka kamot ug usa ka tiil,” matod ni Villacampa.

Dihang napahibawo si Villacampa nga dunay lawas sa maong babaye nga napalgan sa sapa didto sa Sityo Kalubihan sa Barangay Talamban human nakig-alayon kaniya ang Talamban Police Station, gipakawot og balik niini ang nalubong na nga tiil ug kamot.

“Dili ko makaingon nga mao to ang tiil ug kamot sa babaye kay ang among regional crime laboratory ra man ang makasulti ana,” dugang ni Villacampa.

Mipasabot si Villacampa nga kon posible man gani nga ang tiil ug kamot nga nakit-an didto sa Barangay Looc ug lawas nga nakit-an sa Barangay Talamban usa ra, posibleng nahulog ba kaha to sa plastik.

“Dili pud wad-on nato ang posibilidad nga gipangkatagkatag ang mga parte sa lawas sa maong babaye,” matod ni Villacampa.

Gipahibawo sa kapulisan sa dakbayan sa Mandaue nga ang kamot ug tiil anaa na sa purenarya kon asa ang lawas nga nakit-an aron madungan og susi kon usa raba ka tawo ang tag-iya niini.

Samtang si Police Captain Jonathan Taneo, hepe sa Talamban Police Station, nagkuha sa pinakaulahi niini nga imbestigasyon may labot sa patay nga lawas sa maong babaye nga nakaplagan sa tatayan sa Sityo Kalubihan sa maong barangay.

Gikonsiderar ni Taneo nga usa ka dakong grupo ang mibuhat sa dili tiaw nga krimen kon ang plano sa mga suspek mao ang pagtadtad sa lawas sa maong babaye ug gipakatag sa nagkalain laing lugar.

Siya nidugang nga tanang anggulo sa imbestigasyon ilang subayon aron masusi kon unsa gyud ang motibo sa pagpatay sa biktima, apan mas unahon una nila ang pag-ila niini aron mas mahatagan sila og giya.

“Ang mas maayo gyud, sir, nga mailhan ang biktima kay dinha sa iyang pagkatawo masusi nato ang background niini,” sigon ni Taneo.

Nakaeskedyul na usab ang regional crime laboratory sa adlaw aron mapaubos sa autopsiya ang patay nga lawas samtang mag-cross match sa lawas ang kamot ug tiil kon usa raba ka tawo ang nanag-iya niini.

“Kon mag-cross match ang lawas nga napalgan sa Barangay Talamban ug ang tiil ug kamot nga nakuha sa Mandaue, kon magpositibo man gani nga mao ra nga tawo, ang paris na usab sa kamot ug tiil lakip na ang ulo maoy pangitaon.

Si Dr. Benjamin Lara, medico legal sa Regional Crime Laboratory (RCLO)- 7 sa interview sa Superbalita Cebu, miingon nga karong adlawa pa, Lunes, niya himuon ang pag-autopsy sa lawas sa babaye nga biktima sanglit nga kagahapong adlawa, Dominggo, dunay naka eskedyul niini nga laing gi-autopsy ug ipaubos sa dugang pakisusi saman sa DNA test.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph