Paglawig kadagatan gisuspenso tungod ni ‘Quinta’

Amper Campaña

GISUSPENSO karon sa Coast Guard Station (CGS) Central Cebu ang tanang biyahe sa tanang sakyanan sa dagat nga nakaeskidyul mobiyahe ngadto sa mga lugar nga gipaubos sa tropical cyclone warning signal.

Sa usa ka notice nga iyang giluwatan, Dominggo, Oktubre 25, 2020, si Alvin Dagalea, CGS Central Cebu acting commander, nagkanayon nga kini isip usa ka protective measure aron malikayan ang maritime accidents.

Base sa datos pag Dominggo sa buntag, ang signal no. 2 giisa ngadto sa Catanduanes, Camarines Norte, Camarines Sur, Marinduque, Albay, Batangas, Sorsogon, northern portion sa Masbate, southern portion sa Quezon, Oriental Mindoro, Romblon, ug northern Samar.

Samtang gipaubos sa signal no. 1 ang mga lugar sa Masbate, Quezon, Cavite, Bulacan, Occidental Mindoro, Bataan, southern portion of Zambales, Metro Manila, Eastern Samar, northern parts sa Capiz ug northern portion sa Antique.

Sigon hinoon niya nga mobalik ra ang biyahe kon moarang-arang na ang panahon ug ang kondisyon sa kadagatan aning mga lugara.

Gitugotan usab sa CGS Cebu ang mga sakyanan sa dagat nga mopasilong usa basta lang naka-manifest kini pinaagi sa usa ka written request ug wala sab kini pasahero onboard.

Kasamtangang luwas na sab ang tanang 16 ka crew members sa MV Good Fortune nga gipanag-iya sa Tektite Shipping, human kini makasinati og engine trouble pag Dominggo sa hapon samtang anaa sa vicinity (8.5 nautical miles east) sa Ubay, Bohol ug (13 nautical miles west of) Maasin, Southern Leyte.

Nakaangkla na ang among vessel sa vicinity sa Lapinig Island sa kadagatan sa lungsod sa Pres. Carlos P. Garcia sa Bohol.

Base sa mga inisyal nga taho, nakadawat ang Coast Guard Eastern Bohol og usa ka distress call gikan sa sakayan mga alas 12:46 sa udto sa Dominggo. Nadokumentuhan usab ang maong sitwasyon sa usa ka John Paul Lato, (o “JP Lats” sa Facebook), usa sa mga crew niini, pinaagi sa Facebook live.

“Coast Guard, tabang! Gikulata nami’g bawd diri! Di moandar makina namo naay tubig engine room hinay-hinayan namo’g kuha! Naka-drop anchor mi sa port side,” matod niya.

Matod sa report sa Coast Guard, ang vessel adunay sakay nga 1,640 metric tons sa semento. Nigikan kini sa Naga City, Cebu mga alas 6 sa gabii sa Sabado paingon sa Bicol.

Maingon sa kapitan sa maong barko nga samtang anaa sila sa may Ubay, Bohol gisugat sila’g kusog nga hangin ug bawod. Nasudlan usab og tubig ang ilang ship deck hinungdan nga nag-malfunction ang ilang main engine.

Gi-deploy sa Coast Guard ang MCS-3005 gikan sa Aduana Wharf, Cebu City aron pag-conduct og search ug rescue operation ug inspection sa posible nga oil spill.

“While underway, the PCG maintains active and direct communication with the vessel captain to ensure that all crew remain safe and sound until further assistance is provided,” matod sa report.

Gipaestambay usab ang tanang mga Coast Guard Stations ug Sub-Stations sa Leyte ug Bohol alang sa posible nga vessel ug personnel augmentation.

Gi-deploy usab sa Coast Guard Sub-Station Ubay ang AB-096 gikan sa Port of Ubay, Bohol kuyog ang mga PCG personnel nga gi-train alang sa mga SAR operations ug oil spill inspection aron mutabang sa MCS-3005.

Sa laing bahin, si Jhomer Eclarino, weather specialist sa Philippine Atmospheric Geophysical and Astronomical Services Administration (Pagasa)-Mactan station, nagkanayon nga aduna lamang gamay nga posibilidad nga mapaubos og signal warning ang Central Visayas.

Samtang gisuwat ning maong balita, wala pa hinuoy gale warning nga giisyu sa rehiyon.

Apan, matud niya, bisan pa man walay signal warning sa rehiyon, ang Central Visayas makasinati gihapon og “moderate to strong” nga hangin ug “moderate to rough” nga sea condition diin ang wave height moabot og 1.2 to 4.0 meters.

“Delikado ang gagmay na sasakyan pandagat molawig,” matod niya.

Dugang niya, makasinati usab ang Metro Cebu og “light to moderate with occasional heavy rains” ug thunderstorm tungod sa trough o extension sa Quinta. Posible usab ang mga flashfloods ug landslides.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph