NAPATAY sa mga pulis ang usa sa tulo ka lalake nga ning-iskapo sa bilanggoan sa Mabolo Police Station, pasado alas 10:00 sa buntag sa Lunes, Oktubre 26, sa Cabantan St., Sitio San Vicente, Barangay Luz, Siyudad sa Sugbo.
Patay si Roberto Cadu Ludong, hamtong, walay permanenting address nga nag-atubang og kaso nga illegal drugs.
Matod ni Police Major Dindo Alaras, hepe sa Mabolo Police Station, ang tulo ning-iskapo niadtong Dominggo sa tungang gabii, Oktubre 25, atol sa pagbunok sa uwan. Gilusad dayon sa Mabolo police ang manhunt operation.
Nianang pagka buntag, adunay tawag sa telepono nga nadawat ang Mabolo police nga nasigpatan ang mga naka-eskapo sa Cabantan.
Dali nga niresponde ang mga pulis apan, pag-abot sa dapit, nanagan kini sa mga sudlunong bahin.
Usa sa mga pugante nakita pa nga naglataylatay sa atop sa mga balay.
Sa pagkanaug niini, nisuway pa kini sa pagpusil sa mga pulis apan naunhan kini hinungdan sa iyang kamatayon.
“Pagnaug niya mibunot pa siya mao tong gipusil,” matod ni Alaras.
Nadakpan nila ang usa nga si Oliver Basak, samtang pabilin pang gawasnon si Nico Baylosis.
Nadakpan si Ludong niadtong Septiyembre 19, 2020 sa kasong pagpayuhot sa ilegal nga drugas apan wala pa ma commit sa Cebu City Jail kay gipaabot pa unta ang resulta sa swab test sa coronavirus disease 2019 (Covid-19).
Pasabot ni Alaras nga gigabas sa mga pugante ang kabilya nga rehas sa prisuhan nga igo ra masulod ang lawas niini.
Wala mabantayi sa mga jail personnel ang pag-iskapo nila tungod kay kusog ang ulan niadtong tungora.
Dunay 45 ka mga binilango ang Mabolo Police Station nga wala pa madala sa City Jail samtang nagpaabot sa resulta sa swab test.
Giingong ang tulo lang ang nakaiskapo tungod kay sila lang ang masulod sa giputol nga puthaw.
Tungod niini, gipaubos karon sa imbestigasyon ang mga personnel sa Mabolo nga naka-duty sa maong oras diin nahitabo ang pag-iskapo.
Matod ni Police Colonel Josefino Ligan, direktor sa Cebu City Police Office (CCPO), nga mag-atubang ug kasong administratiba ang mga jail personnel ug kung mamatud-an nga sad-an mahimong mataktak kini sa serbisyo.
“Definitely naa to silay administrative liability,” matod ni Ligan.
Sa pagsuwat ning balita nagpadayon ang manhunt operation batok sa padayong gawasnon nga si Baylosis.
Matod ni Ligan nga ilang giila si Baylosis nga armed and dangerous tungod kay sila nagtuo nga nakadala kini og armas nga mahimong mabutang sa peligro ang kinabuhi sa mga pulis.
Mimandoan usab dayon og greyhound operation si Ligan sa tanang bilangoan sa onse ka police stations sa dakbayan sa Sugbo aron masiguro nga walay gitagoan nga mga gabas sa puthaw.
Gimandoan usab ang tanang chief of police nga monitoron ang mga dalaw nga mohatod og pagkaon tungod sa posibilidad nga didto kini gipaagi ang mga armas ug mahait nga hinagiban.