NAIGO na sab sa laing kaso sa false positive sa coronavirus disease 2019 (Covid-19) ang Philippine Basketball Association (PBA) Philippine Cup bubble sa Clark, Pampanga.
Gianunsyo sa PBA nga ang magduduwa sa Blackwater Elite nga napositibo sa RTPCR (swab test) ning bag-uhay lang nasutang negatibo human migawas ang laing resulta sa swab test kagahapon.
Ang antigen procedure nga giagian sab sa magduduwa sa Elite mipagawas sab og negatibong resulta.
Mao sab kini ang nahitabo sa usa ka referee sa miaging semana.
Nagpasabot kini nga nagpabiling limpiyo gikan sa hulga sa Covid-19 ang PBA bubble.
“The PBA bubble remains intact, and has not been breached,” matod ni Commissioner Willie Marcial.
“Nevertheless we urge all participants to be extra cautious and strictly follow the protocols set for them inside the bubble.”
Hinuon aron makaseguro, ang PBA midesisyon nga i-quarantine lang gihapon ang magduduwa sa Elite sama sa ilang gibuhat ngadto sa referee.
Giklaro ni Marcial nga mas pahugtan pa sa PBA ang pagpatuman sa ilang health protocols lakip na niini ang physical distancing ug pagsul-ob og mask ug face shields.
Ang mga makasupak pahamtangan og silot. (ESL)