Mga duwa karon
4:00 pm - Alaska
batok Terrafirma
6:45 pm - Rain or Shine
batok Ginebra
Parehong mosuway og bangon gikan sa kapildihan ang Brgy. Ginebra Gin Kings ug Rain or Shine Elasto Painters sa ilang panagsangka sa main game karong gabii sa 2019-20 Philippine Basketball Association (PBA) Philippine Cup bubble sa AUF Gym sa Angeles City, Pampanga.
Human nila sugdi ang komperensiya og upat ka sunodsunod nga kadaugan, ang Gin Kings nasugamak sa dakong kapildihan batok sa Magnolia Hotshots, 102-92, niadtong Dominggo, Oktubre 25, 2020 nga nagpatagak sa ilang rekord sa 4-1.
Ang Elasto Painters nakatilaw og dakong kulbahinam nga kapildihan, 88-89, batok sa Alaska Aces human nila sugdi ang komperensiya og tulo ka sunodsunod nga kadaugan nga nagpahagsa sa ilang rekord sa 3-1.
Gikan man tuod sila sa kapildihan apan taas ang moral sa Gin Kings hilabi na kay hinayhinay nang nabalik ang saktong kondisyon nila ni Japeth Aguilar ug LA Tenorio, kinsa parehong gikan sa pagkaangol.
Gawas niini, maayo sab ang gipakitang duwa nila ni Stanley Pringle, Scottie Thompson, Prince Caperal, Arvin Tolentino, Jeff Chan ug Aljon Mariano sa matag tahas sa Gin Kings.
Ang Elasto Painters mosandig og maayo nila ni Javee Mocon, Rey Nambatac, James Yap, Gabe Norwood, Beau Belga, Jewel Ponferrada, rookie Adrian Wong, ug Sydney Onwubere.
Sa premirong duwa, magsangka ang Alaska (3-3) ug terrafirma Dyip (0-4). (ESL)