NIPABUHAGAY ang Department of Health (DOH) nga sayo pa nga ideklarar nga “false positive” ang duha ka mga kaso sa coronavirus disease 2019 (Covid-19) nga miigo sa Philippine Basketball Association (PBA) Philippine Cup bubble sa Clark, Pampanga.
Matod ni Health Undersecretary Maria Rosario Vergeire nga dugang mga detalye ang kinahanglan pa nga tun-an una madekalarar nga false positive ang maong mga kaso nga naglambigit sa usa ka referee ug usa ka magduduwa sa Blackwater Elite.
Ang maong referee ug magduduwa parehong na-positibo sa Covid-19 gamit ang RT-PCR (swab test).
Hinuon negatibo ang resulta sa antigen test ug laing swab test nga gitira sa duha hinungdan nga mianunsyo ang mga opisyal sa PBA ug Clark Development Corporation nga wala pa’y nakasulod nga kaso sa Covid-19 sa PBA bubble.
“Hinihingi pa natin iyong details noong laboratory para mapag-aralan ng ating mga eksperto. We cannot leave appropriate conclusion at this time because we have not seen all the details para malaman natin kung false positive ba talaga ‘yan o hindi,” pasabot ni Vergeire sa online forum nga napatik sa www.abs-cbnnews.com.
Gipasabot ni Vergeire nga kasaligan lang ang resulta sa antigen test sa mga tawo nga adunay sentomas sa Covid-19 basi sa pamahayag sa World Health Organization ug Health Technology Assessment Council sa Pilipinas.
Ang referee ug ang magduduwa sa Elite pulos wala’y sentomas.
“When it comes to antigen test, it is most accurate sa may sintomas, sa mayroong impeksiyon. Sa first five days of illness, diyan pinaka-accurate ang antigen test,” pasabot ni Vergeire.
“Maaring nung kinunan sila ng antigen test, they did not exhibit symptoms; baka sakaling hindi sila infectious, kaya nag-negative ang antigen.” (ESL)