GIPAHIMANGNUAN si Calvin Abueva sa iyang kanhi coach sa Pampanga nga si Alan Trinidad nga dili na mohimo og salawayong mga binuhatan human gilibkas sa Philippine Basketball Association (PBA) ang indefinite suspension nga gipahamtang niini ngadto sa gitawag og “The Beast.”
Nagpasalamat si Trinidad nga gipasaylo na sa PBA si Abueva apan iyang gitino nga siya mismo, dili mopatuyang sa kontrobersyal nga basketbolista, kinsa lumad nga taga Pampanga.
Matod ni Trinidad nga ang pagbalik ni Abueva sa PBA human sa 16 ka mga buwan nga pagkasuspenso nakahatag og kalipay sa Pampangueños lakip na ni governor Dennis ‘Delta’ Pineda gumikan kay makaduwa na kini sa PBA bubble nga gipahigayon sa Pampanga.
Hinuon matod ni Trinidad nga kinahanglang pamatud-an ni Abueva nga nagbag-o na kini og kinaiya.
“Siyempre happy kaming mga coaches ni Calvin at si Governor na napag-isip-isip nila ‘yung bigyan ng tsansa ‘yung bata. Pero nag-message din ako sa Facebook niya na sabi ko, mag-thank you ka kay Lord. Pangalawa, gawin mo na ‘yung tamang basketball. Maglaro ka para sa team, huwag ka magmalasakit na makipag-away ka para lang sa isang player na kasama mo na sinaktan,” matod ni Trinidad sa interbui sa Spin.ph.
“Sana maisip mo ‘yung 16 months na nasuspindi ka. Sabi ko, do the best you can para sa improvement ng team mo at ng league. Wag ka na mag-isip ng bagay na wala sa basketball.”
Gipabuhagay ni Trinidad nga kon mousab lang gihapon si Abueva sa paghimo og mga salaod, siya mismo mo-ban niini hangtod sa kahangturan.
“Sabi ko nga, ilagay mo sa isip mo at sa puso mo ‘yung 16 months na sufferings na dinaanan mo dahil ang kasunod ‘yan, kapag nangyari pa ‘yan, kahit ako, totally, iba-ban na kita,” batbat ni Trinidad. (ESL)