USA sa mga pamaagi sa pagsanta sa Covid-19 mao ang sakto nga pagsubay o "contact tracing" sa mga kauban sa may sakit. Sama pananglit sa mga sabungero nga niapil sa tigbakay didto sa Matina niadtong Marso kauban sa may masakiton, kinahanglang i-contact tracing aron dili makatakod sa uban.
Atong mahinumduman nga kadto sila ang gituohang nakapadaghan sa ihap sa mga Covid-positive dinhi sa atong dakbayan. Usa sa mga paagi sa pagpangita sa mga nakauban sa masakiton mao ang paggamit og QR Code o ang "Quick Response Code."
Usa kini ka paagi nga daling mabasa ang impormasyon sa nagdala sa maong code nga gigama sa DENSO Wave (usa ka dibisyon sa DENSO Corporation) niadtong 1994. Gigagmit kini karon sa nagkalainlaing "operating system" sa "mobile device" o cellphone sama sa iPhone ug Android.
Ang bisan kinsa nga may susama niining cellphone pwedeng mag-install og application nga QR scanner aron mabasa ang maong code ug makahimo pa gani og code para sa iyang kaugalingong katuyuan.
Ibutang lang ang QR Code atubangan sa cellphone og mabasa dayon sa QR scanner ang nasulat sa maong code. Busa ang gobyerno naggamit na niini aron daling makit-an ang mga nisulod sa ilang lugar aron sa contact tracing.
Malipayon kita nga ang lalawigan sa Davao del Sur maoy usa sa nag-unang local government units nga naggamit na niini. Salamat ni Gov. Douglas Cagas, nga maoy nagduso nga madayon kini isip paagi sa pagkontrola sa maong balatian.
Angay sab nga atong daygon ang Provincial Information Office sa Davao del Sur nga gipangulohan ni Sherwin Cesar Lpt, nga way-puas sa pagbandilyo sa mga katikaran sa maong probinsya. Ang probinsya sa Davao del Norte naggamit na usab ug OR Code sa ilang contract tracing samtang ang Davao City maglusad pa karong bulan sa Nobyembre.
Sa pagkatinuod, ang QR code unang gigamit sa mga department stores sa Japan aron dili na maghago pa ang kahira sa pagpindot sa presyo sa gipamalit. Unang giimbento sa DENSO Corporation ang "barcode" diin anaa na ang pangalan sa produkto, kinsa ang naghimo, ug presyo.
Apan sa kaulahian, nangita sila'g sistema nga mas daling mabasa sa bisan unsa nga anggulo mao nga naimbento ang QR Code nga gigamit na karon dili lamang sa mga tindahan kondili hasta na sa panginahanglan sa panglawas.
Ang taga Davao del Sur ug Davao del Norte pwedeng mag-abli sa opisyal nga "internet portal" sa ilang probinsya ug moparehistro aron makakuha og ID nga may QR Code. Dali na unya ang pagsulod-gawas sa lugar kay kini lang unya ang i-scan sa mga nagbantay sa checkpoint.
Dali ra sab ka mapangita sa gobyerno kung nakauban nimo ang usa ka masakiton sa Covid aron mag-self quarantine ka o matabangan sa pagpatambal. Atong hinumduman nga wa pa mahuman ang atong kalbaryo.
Gani nitaas pa ang kinatibuk-ang ihap sa natakdan og namatay. Nag-second wave na sa Europe ug mitaas sab diri sa Davao. Busa ipadayon nato sa pag-amping og mosunod sa kalagdaan samtang gipangita pa sa tukmang tambal ug bakuna.