KAPALONG, Davao del Norte -- Usa ka baby girl ang napalgang wala nay kinabuhi nga naglutaw sa Sampao River, Kapalong, Davao del Norte, kagahapon sa buntag, Oktubre 26, 2020.
Matod ni Darlie Tradio sa iyang Facebook post nga nanglaba sila niadtong Sabado sa sapa dihang ilang nakita ang baby nga abi nila og dulaan.
Dihang ila kining giduol, nakurat sila kay usa ka baby ang ilang nakita nga wa nay kinabuhi nga walay sapot ug nagkulob nga anaa sa bani sa saging.
Gituohang bag-ong himugso ang maong baby nga usa ka babaye kinsa naa pa'y pusod nga suma sa mga residente sa dapit ila kining gikonsiderang "Anghel" nga naglutaw sa sapa.
"Naa pa'y pusod, bag-o pang himugso, ginapanubayan na nato ang mga residente sa dapit kung kinsa kadtong manganakay ning bulana. Sa pagkakaron, naa sa punerarya ang baby girl," ingon ni Police Major Ruth Dizon, ang hepe sa Kapalong Municipal Police Station nga nahinabi sa Superbalita pinaagi sa telepono, kagahapon, Oktubre 26.
Ning kasamtangan, padayong nag-imbestiga ang Kapalong Municipal Police Station labot sa maong hitabo.