HALA, gisugat og kontrobersiya ang unang tuig sa pagduma ni Shamcey Supsup sa Miss Universe Philippines 2020.
Lutong makaw kuno ang resulta base sa mga “cryptic post” nilang Michel Gumabao (2nd runner-up) ug Sandra Lemonon (Top 16). Apan unsa may ilang basehan?
Dili sad tingali uy kay 10 kabuok ang hurado. Apil pa gyud ang tigpamaba ni Presidente Duterte nga si Harry Roque maluto na nimo?
Tinuod bitaw nga dunay similarity sa beauty ni Supsup ang nakoronahang Miss Universe Philippines 2020 nga si Rabiya Mateo apan unsa may iyang gahum aron ma-influence niya ang mga hurado?
Akong gibasa ang iyang profile 4 anyos pa lang diay ni siya dihang gibiyaan ni sila sa iyang amahan nga usa ka Muslim-American Indian doctor.
Si Rabiya ug ang iyang manghod nag-inusarang gipadako sa ilang inahan nga usa ka Pinay. Ang ilang kakabos ang gihimo niyang inspirasyon aron makatiwas sa iyang pagtuon.
Ang 23-anyos nga si Rabiya nigradwar nga cum laude sa Iloilo Doctors College ug usa na ka licensed physical therapist.
Nan, asa man diha ang lutong makaw?
HIMIG HANDOG
Nigawas na sa miaging adlaw ang resulta sa Himig Handog Songwriting Competition 2020 sa ABS-CBN.
Ang bugtong composer nga Bisaya nga nakasud si Joanna Ang nga taga-Maasin City, Southern Leyte.
Ang iyang song entry mao ang “Bulalakaw” nga gikatakdang i-interpret sa Cebuanang si Janine Berdin. Better luck next time lang mga taga-Cebu.
OVERRRR!
Kataw-anan nga makalagot ang balita nga giingong gi-warningan sa usa ka senior military official silang Liza Soberano ug Catriona Gray nunot sa gipakita nilang suporta sa grupong Gabriela.
Gipasidan-an sad ni sila nga dili mosunod sa tunob sa sister ni Angel Locsin nga si Ella Colmenares nga sakup na kuno karon sa New People’s Army?
Nia pay lain ay. Gusto sa Kongreso nga ipaimbestigar ang kontrata sa ABS-CBN sa Zoe TV kon wa bay kalapasan.
Sus, kon kana inyong pagkamausisaon inyo pang gi-apply sa Philhealth tingali mas daghan pang malipay. Asa na man ang P15 billion nga gikawat sa Philhealth?
Kana unta inyong tutokan ug paspasan kay ang Red Cross naningil na sa utang sa Philhealth nga halos P1 billion na mao nang wa na silay libreng Covid Test.