WALAY nisupak ug andam motabang ang tag-iya og mga estruktura sa Cebu City Government para mahatagan og alibyo ang problema sa baha.
Kini atol sa gipatawag nga tigom ni Mayor Edgardo Labella sa 83 ka mga building owner nga giila sa Office of the Building Official (OBO) nga adunay parte sa ilang estruktura nga nasulod sa three-meter easement ug nakabara sa pag-agi sa tubig labi na kon magbaha.
Ang White Knight Hotel, kanhi Mango Park Hotel, sa Gen. Maxilom Avenue diin nasangit ang 15 anyos nga batang lalake atol sa pagbunok sa uwan nga niresulta sa pagbaha hapit sa tanang urban areas, andam moguba sa mga haligi sa ilang driveway para dili mabara ang mga basura, gapnod ug dili na moawas ang baha sama sa nahitabo niadtong Oktubre 13.
Laing mga tag-iya og commercial establishments nipadayag gihapon sa ilang suporta sanglit ilang nakita ang maayong katuyoan sa City Government para sa kinabag-an.
Si Labella nagpasalamat sa mga building owner sa ilang kooperasyon sa tinguha nga mahatagan og engineering solution ang problema sa ilang mga building nga dili moabot sa korte pinaagi sa pagpinasakaay og kaso.
“I am pleased that structure owners along our creeks and waterways are cooperating with the City Government in looking for an engineering solution to the flooding problem. We have always been able to appeal to the civic mindedness and corporate social responsibility of the private sector in Cebu City,” padayag ni Labella nga napatik sa iyang official Fb page.
“Dili na kinahanglan magsinampahay og kaso kung mahimo man diay nga magtinabangay ta sa atong private sector. Magbuhat ta og committee uban ang city engineer ug technical working groups..” dugang sa mayor.
Human unya sa pagsulbad sa problema nga giatubang sa 83 ka building owners, isunod ni Labella ang paghatag og alibyo sa 3 meter easement sa mga dagkong sapa nga gipuy-an sa mga tawo. (PAC)