MOABOT og P167.2 milyunes ang balor sa ilegal nga drugas nga nasakmit sa kapulisan sa Central Visayas (CV) sulod sa tulo ka adlaw nga anti-criminality law enforcement operation sugod sa Oktubre 21 ngadto sa 24.
Samtang, kini nilangkon sa pito ka mga ronda ug nasikop ang dul-an usa ka libo ka drug personalities.
Gihingusgan pa sa kapulisan ang ilang kampanya batok sa gidiling drugas ug ubang matang sa kriminalidad pinaagi sa anti-criminality law enforcement operation sa tibuok rehiyon 7.
Sa maong dungan nga operation nakasamit sila og 24.5 kilos sa gituohang shabu nga mobalor ang tanan sa P167,216,867.60 lakip na niini ang 22.1 kilos sa ilegal nga drugas gikan sa usa ka kanhi magtutudlo nga nadakpan sa kapulisan sa siyudad sa Lapu-Lapu sa miaging semana.
Nakasikop usab silag 793 ka drug personalities diin kasagaran kanila nalakip sa high value individual sa regional level ug 250 ka mga armas nga walay lisensya sa 1,568 ka operations samtang moabot usab sa 250 ka mga armas ang gitahan sa kapulisan.
Lakip sa mga nasikop ang most wanted persons nga adunay mga pending warrant of arrest.
Matod ni Police Brigadier General Albert Ignatius Ferro, direktor sa Police Regional Office (PRO) 7, nga daghan pa gihapon ang ilegal nga drugas sa rehiyon 7. (AYB)